Монголын хөгжмийн зохиолчдын холбооны гүйцэтгэх захирал, “Бөртэ” хамтлагийн үүсгэн байгуулагч, Алтай ятга судлаач Д.Ганпүрэв өөрийн фэйсбүүк хуудсандаа нэгэн видео оруулсан нь олон хүний анхаарлыг татлаа. Тэрээр “Монголчуудын уламжлал тасарсан үндэсний язгуур өв соёлуудын нэг “ТОЙРОМ БҮЖИГ”-ийг дахин сэргээхийн төлөө бид жил хагас зүтгэлээ. 
Өнөөдөр анх удаа Үндэсний цэцэрлэгт хүрээлэнд цөөхүүлээ бэлдэж үзлээ. Зургаан настай балчираас 60 настай буурлууд хүрэлцэн ирж хамтдаа цэнгэн бүжив. Үнэхээр гайхалтай нь тэд энэ бүжгийг мэдэхгүй хэдий ч шууд дагаж хийж байгаа нь намайг бишрүүллээ. Маргааш 18:00 цагт бид Үндэсний цэцэрлэгт хүрээлэнд дахин цуглаж Тойром бүжгийн эвент хийнэ. Цэнгэн баясах хүмүүс бүгдээрээ ирээрэй.
Өндөр газрыг өлтөртөл бүжих саглагар модны тойром бүжиг хуурай өвсөнд гал авсан мэт монголчуудыг эвлэлдүүлэн нэгтгэх болтугай. Бас мэргэжлийн бүжигчид, бүжиг дэглээч нарыг хүрэлцэн ирж заавар зөвлөлгөөгөө өгч хамтран ажиллахыг урьж байна” хэмээн бичсэн байв. Тэрээр үндэсний мартагдсан өв болох тойром бүжгийн талаар олон судалгаа хийж, бүжгийн аяыг сэргээн зохиосон билээ. Энэ арга хэмжээгээ цаашид хагассайн бүр уламжлал болгон зохион байгуулахаар төлөвлөөд байгаа аж.
