“NOISE METAL FEST 2016” нь Монголд зохиогдож буй олон улсын чанартай анхны төрөлжсөн метал хөгжмийн наадам билээ. Гадаадын болон Монголын шилдэг амьд хөгжмийн хамтлаг дуучдыг танилцуулж Монголын амьд хөгжмийн түүхэнд нэгэн шинэ хуудас нээх зорилготойгоор гурав дахь удаагаа зохиогдох гэж байна.
Анх 2014 онд зохион байгуулагдсан цагаасаа эхлэн олон улсын гэсэн статустай наадамд Mongol (Канад), Nine Treasures (Өвөр Монгол), Defiled (Япон) зэрэг олон улсад танигдсан гадаад хамтлагууд оролцож, мөн тус наадмын тайзнаас Монголын хэд хэдэн залуу хамтлагууд өөрсдийн гараагаа эхлүүлж байсан бол одоо уран бүтээлийн арвин амжилттай яваа билээ. Тэгвэл тун удахгүй болох наадамд дэлхийд танигдсан Японы Sete Star Sept болон DESECRAVITY, ОХУ-ын Inner Missing, АНУ/Канад-ын Hitobashira зэрэг амьд хөгжмийн хамтлагууд болон Хурд, Аясын Салхи, Булсара, Метроном зэрэг Монголын шинэ, шилдэг 10 гаруй хамтлаг дуучид оролцож, өөрсдийн уран бүтээлээ толилуулахаар болжээ.
