Б.БАДРАЛ
Британийн Гадаад тагнуулын алба “MI6” нь дэлхийг бүрхээд байгаад алан хядлагатай тэмцэх зорилгоор нь 2020 оноос өмнө ажилтнуудынхаа тоог 1000-аар нэмэхээр болсон тухай “Times” сонин мэдээллээ. Ингэснээр “MI6”-ийн албан хаагчдын тоо 3,5 мянгад хүрэх юм.
Британийн сөрөг тагнуул, гадаад тагнуул, Төрийн холбооны удирдах газрын ажилтнуудын тоог 15 хувиар буюу 1900 хүнээр нэмэгдүүлэхээр төлөвлөж байгаагаа өнгөрсөн жил мэдэгдэж байсан нь ийнхүү хэрэгжиж эхэлсэн бололтой.
“MI6” нь боломжит аюул заналхийлэл ба дэмжигч нарыг тодорхойлох зорилгоор асар их хэмжээтэй тоон өгөгдөл боловсруулах шаардлагатай болдог тул цаашид үйл ажиллагаагаа илүү үр ашигтай болгохын тулд ажилтнуудынхаа тоог ингэж нэмэхээс өөр аргагүй гэнэ.
Тус албаны дарга Алекс Янгер нь “эсрэг талынхан маань бидний хэрхэн ажиллаж байгааг ил харах боломж олгодог аюулыг тоон ертөнц агуулж байгаа тул бид ажиллаж байгаа арга барилаа бүхлээр нь өөрчлөх шаардлагатай боллоо” гэжээ.
Үүнээс гадна Британий 2020 он хүртэл алан хядлагатай тэмцэх тусгай хүчний санхүүжилтийг хоёр тэрбум фунтээр нэмэгдүүлэхээр болсон байна. Энэ мөнгөний багагүй хэсэг нь кибер дайралтаас хамгаалахад зарцуулагдана.
Оросын тусгай албадыг сүүлийн үед орон орны Засгийн газар, нөлөө бүхий намуудын сервер рүү хакер дайралт хийж байна гэж буруутгах явдал асар нэмэгдсэн нь Өрнөдийн орнуудыг энэ мэтээр кибер дайралтыг эсэргүүцэх ажлын санхүүжилтийг нэмэгдүүлэхэд багагүй нөлөөлж байгаа бололтой. Саяхан гэхэд л Германы парламентын гишүүд, намуудын серверүүд “АРТ28” нэртэй хакер бүлэглэлийн дайралтад өртсөн тухай мэдээ дуулиан тарьж байна. Энэхүү дайралтыг хийсэн гэх “АРТ28” бүлэглэлийг Оросын тагнуулын албад байгуулж ажилладаг гэж Германы шинжээчид үзжээ. Хөдөлшгүй нотлох баримт үгүй байгаа ч энэ бүлэглэлийн хакерууд ямагт даваагаас баасан гарагуудад, Москвагийн цагаар 8:00-17:00 цагийн үед дайралт хийдэг, хулгайн программын тохиргоо нь орос хэл дээр байдаг гэсэн онцлогтой тул Оросын тагнуулын албаны ажилтнууд гэж сэрдэх нөхцөл бүрдүүлсэн гэнэ. Германы улстөрчдийн эсрэг хийсэн ээлжит дайралт нь эдгээр шинж тэмдэгийг бүгдийг агуулж байсан тул Оросын тусгай албадыг буруутгаад байгаа юм. Үүнтэй холбоотойгоор Германы улс төрийн намууд, парламент, Засгийн газрыг хамгаалах шаардлагатай байгаа тухай албаны хүмүүс ярьсан байна.
Иймд тун удахгүй Германы тусгай албад ч кибер дайралтаас хамгаалахын тулд санхүүжилтээ нэмэх шийдвэр гаргаж магадгүй.
