Т.ЦЭЛМЭГ

Монгол Улсын 27 дахь Ерөнхий сайд Н.Алтанхуягийн шинэчлэлийн танхим 2012 оны наймдугаар сарын 20-ны өдөр бүрдсэн.
Монгол Улсын 29 дэх Ерөнхий сайд Ж.Эрдэнэбатын мэргэжлийн танхим 2016 оны долдугаар сарын 30-нд бүрдсэн.

2012 онд сонгуулийн дараа байгуулагдсан Н.Алтанхуягийн Засгийн газар төсвийн алдагдал нь 1 их наяд төгрөгт хүрсэн, Хятадын төрийн өмчийн “Чалко” компаниас 350 сая ам.долларын зээл авч иргэддээ бэлэн мөнгө болгон тарааж, нийтдээ 600 сая гаруй ам.долларын гадаад өртэй Монгол Улсыг хүлээн авсан.
2016 оны сонгуулийн үр дүн гарсны дараа Ерөнхий сайд Ж.Эрдэнэбат Засгийн газраа байгуулаад 1,8 их наяд төгрөгийн төсвийн алдагдалтай, 23,5 тэрбум /үүнд Засгийн газар, Хөгжлийн банк, Монголбанк, Арилжааны банкууд, Аж ахуйн нэгжүүдийн өр, Хөрөнгө оруулагч нараас авсан зээл зэргийг нийлүүлээд/ төгрөгийн гадаад өртэй улс орон хүлээн авлаа гэж халаглав. Харин 2012 оны УИХ-ын сонгуулийн дараа шинээр бүрдсэн Засгийн газар нэг намынх бус МАХН-МҮАН-ын “Шударга ёс” эвсэл, ИЗНН-ыг танхимдаа багтаахдаа ийм ядуу улсыг бид удирдах нь ээ гэж олонд зар түгээлгүй ажлаа эхлүүлсэн.

Нэгэнт л улс орноо аваад явах чадалтай гэж ард түмэнд амлалт өгч, итгэлийг нь хүлээн засаг авсан бол шалтаг тоочилгүй яаж ажиллахаа л харуулмаар байна. Н.Алтанхуягийн Засгийн газар ажлаа ингэж хийнэ, тэгж шинэчилж чадна хэмээн амлаж, таван тэрбум ам.долларын зээл гадаад зах зээлээс босгож, үйлдвэржилт, бүтээн байгуулалтад зарцуулахаа шууд зарласан. Тэгвэл Ж.Эрдэнэбатын Засгийн газар шууд л Олон улсын валютын сангийн “Стэнд бай” хөтөлбөрт л хамрагдахгүй бол болохгүй байгаагаа ярих болов. “Чингис” бондын 1,5 тэрбум ам.доллар, “Самурай” бондын 30 тэрбум иен гадаадын зах зээл дээрээс татаж чадсан нь Шинэчлэлийн Засгийн газар. Харин гадаадын банкуудыг Монголд оруулж ирж, эдийн засгаа сэргээх бодлого баримталж буйгаа хямрал гэдэг үгээр л тайлбарлаж байгаа нь мэргэжлийн Засгийн газар.

Хамгийн энгийн харьцуулалтыг Шилэн дансны тухай хуулийг хэрэгжүүлэхгүй, “11-11 төв”-ийг татан буулгасан гээд олон түмэнд нээлттэй байхаасаа төвөгшөөж эхэлснээр нь харж болно.

Нэгийг нөгөөтэй жишиж зүйрлэхдээ харьцуулалт хийдэг. Аливаа Засгийн газар ажлаа эхлүүлээд 100 хоногт юу амжуулсан бэ гэдгээс цаашдаа хэр урт удаан настай, ямар чадамжтайг ч урьдчилж харж, таамаглаж болдог. Гурван сар гэдэг шинэ байгууллага байлаа ч тодорхой дэвшил эсвэл уруудалт гарах хангалттай хугацаа. Тийм ч болохоор ямар ч салбар, ялангуяа улстөрчдийг, улс төрийн хүчнүүдийг харьцуулж үнэлэмжээ өгөхөд нэмэр болгож Н.Алтанхуяг, Ж.Эрдэнэбат нарын 100 хоногт юу амжуулсныг тоймлов.