Б.АНАР
Улстөрчдийн рейтингээр эхний 10-аас бууж үзээгүй УИХ-ын гишүүн асан Г.Уянга УИХ-ын сонгуулиар парламентын гадна хоцорсон. Тэрээр сонгуулийн өмнө Тусгаар тогтнол, эв нэгдлийн намын даргаар сонгогдсон ч энэ намаас УИХ-д нэг ч гишүүн сонгогдоогүй. Гэсэн ч улс төрийн нөхцөл байдал, өрнөж буй үйл явдлыг анхааралтай ажиглаж, дүгнэлт, шийдэл гаргаж байгаа талаар Тусгаар тогтнол, эв нэгдлийн намын дарга Г.Уянга өчигдөр мэдээллээ.
Тус нам “Эрдэнэт” үйлдвэрийн 49 хувийг дотоодын компани худалдаж авсан үйл явцыг дээрмийн гэмт хэрэг гэж үзэж байгаа юм.
Энэ тухайгаа тус нам “Монгол Улсын төсвийн 40 хувийг дангаар бүрдүүлдэг “Эрдэнэт” үйлдвэрийг МАНАН-гийн бүлэглэл хууль бусаар авч түүнийгээ Монголд ашигтай ажил хийсэн мэтээр тайлбарлаж байгааг эсэргүүцэж байна. Монголын болон Оросын талын аль нь ч хувьчлал явуулаагүй, харин “зүгээр л худалдан авалт” хийсэн байхад яахаараа “Эрдэнэт”-ийн 49 хувь ганцхан компанийн хувийн өмч болов гэдгийг Ерөнхийлөгч Ц.Элбэгдорж тайлбарлах ёстой. Ноён Ц.Элбэгдорж “нэр томъёоны хувьд хувьчлал биш” гэж залилах оролдлого хийсэн ч бодит байдал дээр хувьчлалтай төстэй дээрэм болсон нь тодорхой байна” гэсэн юм.
Мөн “Эрдэнэт” үйлдвэр Монголд ч, ОХУ-д ч төрийн өмч байгаа тохиолдолд түүнийг худалдах эсэх нь хоёр төрийн мэдлийн асуудал байх ёстой. ОХУ өөрийн мэдлийн хувийг манайд зарж шилжүүлсэн тохиолдолд түүнийг өмчлөгч нь юуны өмнө Монголын төр байх нь гарцаагүй. Монголын төр ямар ч хувьчлал явуулаагүй. Иймээс “Эрдэнэт” үйлдвэр Монголын бүх ард түмний өмч хэвээрээ байна гэж үзэж байгаа аж.
Тиймээс “Эрдэнэт” үйлдвэрийн асуудлыг хуулийн дагуу шийдвэрлэх боломжтой хувилбаруудыг санал болгож байгааюм банйна. Тухайлбал, “Эрдэнэт” үйлдвэрт үүссэн асуудлыг УИХ-аар элэлцэж шийдвэрлэх, “Эрдэнэт” үйлдвэрийн 49 хувийг төрийн мэдэлд авч, 100 хувь төрийн өмчит компани болгох, нээлттэй тендер зарлан Эрдэнэтийн хувьчлалд Монголын аж ахуйн нэгжүүдийг адил, тэгш эрхтэй оролцох боломж бүрдүүлэх зэрэг замаар МАНАН-гийн бусармаг үйлдлийг таслан зогсоох ёстой гэв.
