Монголын “Хар сарнай” хамтлагийн ахлагч, дуучин С.Амармандахыг концертын нь дараа ОХУ-ын ЭСЯ-ны согтуу ажилтан зодсоны улмаас репер дуучин хүнд бэртэл авч эмнэлэгт хүргэгдээд байна.
Энэ ссарын 23-нд нийслэлийн Хан-Уул дүүрэгт оршдог Home Plaza худалдааны төвд нийслэлийн Засаг даргын зохион байгуулсан  “Аз жаргалтай Улаанбаатар” арга хэмжээний үеэрх энэ явдал болсон байна.
Гадаадын зочид, Орос, Хятадын элчин сайд, дипломат ажилтнууд, Улаанбаатар хотынхонон оролцсон энэ арга хэмжээнд “Хар сарнай” хамтлагийн ахлагч С.Амармандах урилгаар ирж хэд хэдэн дуу дуулсан байна.
Тоглолтын дараа С.Амармандах танхимаас гарч гэрээдээ явах гэж байхад нь ОХУ-ын ЭСЯ-ны согтуу ажилтан араас нь очиж архины шилээр толгой руу нь цохьжээ. Хүчтэй цохилтын улмаас дуучин ухаан алдаж унахад нь оросын ЭСЯ-ны ажилтан найзуудынхаа хамт түүнийг толгой, биеийг нь өшиглөн хэрцгийгээр зодсон байна.
Тухайн байгууллагын хамгаалалтын ажилтнууд очиж салгаснаар дуучин азаар амьд гарчээ. Энэ балмад үйлдэл One Event Hall танхимын хяналтын камерт бичигдэж үлдсэн байна.

Монголын хэвлэлүүд энэ хэрэгт оросын ЭСЯ-ны ажилтныг буруутган бичиж эхэллээ.
Энэ хэрэгт өөрийн нь ажилтан оролцсон эсэхийг Монгол Улс дахь ОХУ-ын ЭСЯ одоогоор батлаагүй байгаа юм. “Одоогоор энэ мэдээллийг шалгаж байна. Урьдчилсан байдлаар үнэхээр ингэсэн гэдэг нь нотлогдоогүй байгаа” гэж дипломат байгууллагын төлөөлөгч хэлснийг “Ридус” хэвлэл бичсэн байна.

Үүнээс гадна дуучныг ингэж хэрцгийгээр зодсон шалтгаан бас тодорхойгүй байна. Нэг эх сурвалжийн хэлснээр бол дуучны хувцасан дээрх хас тэмдэгт оросын ЭСЯ-ны ажилтан дургүйцсэн гэнэ. Үнэхээр Амармандахын нэг клип дээр үндэснийхээ хувцсан дээр нацистын бэлгэ тэмдэг хас тэмдгийг томоор  дүрсэлж оёсон байдаг юм.

Хэдийгээр хас тэмдэг нь эртнээс, бүр палеолитын үеэс түгэн дэлгэрч, бурхны шашинд ихэд хэрэглэдэг боловч оросуудын хувьд хэт дарагийн бэлгэ тэмдэг гэж үздэг юм. Түүнийг хэрэглэхийг ОХУ-ын Үндсэн хуулийн шүүх “Аугаа их Эх орны дайны жилүүдэд амь үрэгдсэн хүмүүсийг дурсгалыг гутаасан хэрэг” гэж үзэхээр заасан байдаг.
Зарим хэвлэд дурдсанаар бол дуучин оросын зочидтой  “Хайль Гитлер” гэж мэндэлсэн гэж бичиж байна. Үнэхээр “Хар сарнай” хамтлагийн энэ дуучин үндсэрхэг үзлээр ялангуяа хятадуудыг үзэн яддагаараа алдартай нэгэн хэмээн оросын newsru.com сайтад бичсэн байна.

ОХУ-ын ЭСЯ-ны албан ёсны веб хуудсанд “Хар сарнай” хамтлагийн дуучин С.Амармандахыг оросын нэрийг нь дурдаагүй дипломат ажилтан зодсон хэрэг, болсон үйл явдал, монголын хэвлэлүүдээр гарч байгаа мэдээллийг одоогоор судалж байна гэж  Монголд суугаа ОХУ-ын ЭСЯ-ны хэвлэлийн алба мэдээлж байна. Урьдчилсан байдлаар зарим блогчид, ялангуяа "Asia Russia Daily" сайтад бодит мэдээллийг гуйвуулж, он сар өдөр, нөхцөл байдлыг гуйвуулж мэдээлж байна” хэмээн бичсэн байна.