Т.ЦЭЛМЭГ
Өнөөдөр Ардчиллын төлөөх таван нам нэгдсэн 16 жилийн ойн өдөр. 2000 оны арванхоёрдугаар сарын 6-ны өдөр Монголын Ардчилсан нам, Сэргэн мандалын нам, Монголын социал демократ нам, Монголын Үндэсний ардчилсан нам, Монголын Шашинтны ардчилсан нам нэгдсэн билээ. Тухайн үед МоАН-ын дарга С.Эрдэнэ, Сэргэн мандалын намын дарга Д.Бямбасүрэн, МҮАН-ын дарга Р.Амаржаргал, МСДН-ын дарга Р.Гончигдорж, МШАН-ын дарга Ц.Баярсүрэн байв. 2000 оны УИХ-ын сонгуульд ардчиллын төлөөх намууд ганцхан суудалтай үлдсэн юм. Ардчилсан нам болсны дараахан бие даагч Л.Гүндалай элсэн орж, УИХ-д хоёрхон гишүүнтэй нам болж байлаа. Энэ их ялагдлын дараа ардчиллын төлөөх намууд нэгдэж нийлэх ёстойгоо ухаарч, ийм шийдэлд хүрсэн тухай олон хүний дурсамж, намтар түүхэнд өгүүлсэн нь бий. Ингээд Ардчилсан нам болж нэгдэн Улсын дээд шүүхэд бүртгүүлээд 16 дахь жилдээ буюу өргөн хүрээгээр нь авч үзвэл 26 настай ид залуу үедээ хүрлээ.
Улс төрийн таван хүчин нэгдэж нийлснээс хойш тоолбол Ардчилсан намыг зургаан дарга удирдаж авч явжээ. Таван нам нэгдэж анхны даргаар Д.Дорлигжавыг сонгож, 2000-2002 он хүртэл ажилласан. Улс төрийн намын туйлын зорилго болох засгийн эрхийн төлөөх төрийн сонгуульд оролцож, үзүүлсэн амжилтаар нь тухайн даргыг хэр сайн удирдан манлайлагч байв гэдгийг дүгнэдэг.
Дөнгөж нэгдээд удаагүй байхад анхны сонгуульд бэлтгэж, амжилттай оролцоно гэдэг амаргүй даваа нь мэдээж.
Д.Дорлигжав дарга болоод удаагүй 2001 онд Ардчилсан нам Ерөнхийлөгчийн сонгуульд оролцсон. Р.Гончигдоржийг өрсөлдүүлсэн ч ялагдал хүлээж, тухайн үеийн Монгол Ардын хувьсгалт намын нэр дэвшигч Н.Багабанди 58,81 хувийн саналаар Ерөнхийлөгчөөр улиран сонгогдсон. Энэ хугацаанд Ардчилсан нам парламентын гадна байсан болохоор жинхэнэ утгаар сөрөг хүчин байж чадсан юм.
Дараагийн дарга нь М.Энхсайхан 2005 он хүртэл ажиллав. Ардчилсан нам болж нэгдээд парламентын анхны сонгуульд оролцсон нь энэ. 2004 оны сонгуулиар “Эх орон-Ардчилал” эвсэл болж нэгдэн 35 суудалтай болов. Нэр дэвшүүлэхдээ Эх орон намд олон нэр дэвших эрх өгч, дийлэнх нь суудал авч чадалгүй ялагдсан гэсэн гомдол Ардчилсан намд гарч үүнээс үл ойлголцол эхэлсэн гэдэг. Аль ч нам олонхийг дангаараа бүрдүүлэхээргүй байсан тул эвсэл байгуулж, Засгийн газраа бүрдүүлсэн. М.Энхсайхан 2005 оны Ерөнхийлөгчийн сонгуульд Ардчилсан намаас өрсөлдөөд Монгол ардын хувьсгалт намын нэр дэвшигч Н.Энхбаяр 53,4 хувийн саналаар сонгогдон Ерөнхийлөгч болсон юм. Намын даргаа өгснөөр М.Энхсайхан удалгүй Үндэсний шинэ нам гэж байгуулсан билээ. Гэхдээ энэ хугацаанд дээр дурдаад өнгөрсөн багагүй асуудал Ардчилсан намд үүссэн байдаг. Намынхаа гишүүдийн итгэлийг алдсан учир М.Энхсайханыг даргаас чөлөөлөх хүсэлт гаргаж, удаа дараа шийдвэрлэх гээд чадаагүй аж. Арга буюу Р.Гончигдоржийг дараагийн дарга болгосон ч М.Энхсайхан тамга тэмдгээ хүлээлгэж өгөлгүй Ардчилсан нам хоёр тамгатай, хоёр даргатай болж Улсын дээд шүүх хүртэл зарга хийсэн түүх бий. Гэхдээ асуудлыг Их хурлаараа шийдэж албан ёсоор Р.Гончигдорж Ардчилсан намын даргаар ажилласан юм.
Гуравдахь дарга Р.Гончигдорж ганцхан жил Ардчилсан намыг удирдсан. Түүхэндээ хамгийн богино хугацаанд ажилласан дарга. 2005-2006 оны хооронд ямар нэг сонгуульд удирдаж ороогүй ч ерөнхийдөө М.Энхсайханаас тамга тэмдгээ салгаж авахын тулд түр дарга тавьсан хэмээн тайлбарлах нь бий. Фракцуудын зөрчил ч төдийлэн намжаагүй цаг үе ч гэдэг. Ингээд төд удалгүй АНУ-ыг зорьсон Ц.Элбэгдорж эргэн ирж, Ардчилсан намын шинэ дарга болов.
2006-2008 онд Ц.Элбэгдорж намын дарга болсноор гал намжаах бодлого барьж ажилласан байна. Ерөнхий сайд, УИХ-ын даргаа ээлжлэн томилох эвслийн гэрээний дагуу Ц.Элбэгдорж гүйцэтгэх засаглалыг тэргүүлэв. Тухайн үед Ерөнхий сайд нь намын дарга байх зарчмыг баримталж Ардчилсан намын даргын суудлыг мөн түүнд өгсөн байдаг. Харин МАХН гэрээгээ зөрчиж сайд нар нь танхимаа орхин гарснаар огцорсон. Гэсэн ч намын даргын хувиар Ардчилсан намыг 2008 оны УИХ-ын болон орон нутгийн сонгуульд удирдан орж, дангаараа 28 суудалтай болсон юм.
Түүний дараа жилийн Ерөнхийлөгчийн сонгуулиас өмнө Ардчилсан намын даргыг шинээр сонгосон. З.Энхболд, Н.Алтанхуяг нар өрсөлдөөд олонхийн саналаар Н.Алтанхуяг Ардчилсан намын даргаар ажиллаж эхлэв. Ингээд 2009 оны Ерөнхийлөгчийн сонгуульд Ардчилсан намаас Ц.Элбэгдоржийг сойсон. МАХН-аас нэр дэвшигч Н.Энхбаяртай өрсөлдөөд Ц.Элбэгдорж сонгогчдын 51,2 хувийн саналыг авч анхны ардчилсан Ерөнхийлөгч болсон юм. Н.Алтанхуягийг даргаар ажиллах хугацаанд оролцсон бүх шатны сонгуульд Ардчилсан нам ялалт байгуулж, олонхийг бүрдүүлсэн байдаг. 2012 оны УИХ-ын сонгуульд Ардчилсан нам 34 суудалтай болж парламентад олон суудалтай ч олонхи хараахан болж чадаагүй. МАХН-МҮАН-ын “Шударга ёс, эвсэл”-тэй хамтран Засгийн газраа эмхэлсэн. 2013 оны Ерөнхийлөгчийн сонгуульд мөн Ц.Элбэгдоржийг Ардчилсан намаас нэр дэвшүүлэн өрсөлдүүлж, ялалт байгуулав. 2014 онд нь Н.Алтанхуяг намын даргаас чөлөөлөгдсөн. Тэрээр 16 жилийн түүхийн хугацааны зургаан жилд нь Ардчилсан намыг тэргүүлжээ. Гэхдээ тухайн цаг үеийн нөхцөл байдал Ардчилсан намд ээлтэй жилүүд байсан гэсэн тайлбарыг ч хэлэх нь цөөнгүй.
Зургаа дахь дарга нь З.Энхболд. Тэрээр Н.Алтанхуягийг Ерөнхий сайдаас огцруулсны дараа Ардчилсан намын даргын албан тушаалд очсон. УИХ-ын дарга намын дарга болсон анхны тохиолдол. Энэ үеэс тус намын дунд үүссэн зөрчил ил гарч эхэлсэн билээ. Яг үүнтэй зэрэгцэн Үндэсний зөвлөлдөх хорооны нөхөн сонгууль /ротаци/ хийгээгүй олон жил явсан талаар гишүүдээс гомдол гарч, дотоод асуудал гадна гартлаа даамжирсан. Гэхдээ энэ нь өмнөх дарга Н.Алтанхуягтай холбоотой гомдол. Ерөнхийдөө ойлголцохгүй явсаар 2016 оны сонгуультай Ардчилсан намынхан золгов. УИХ, Нийслэлийн ИТХ-ын сонгуульд олон тойрог, суудлаа алдаж Ардчилсан нам ялагдлаа хүлээн зөвшөөрөхөөс өөр аргагүй байдалд хүрэв. Парламентын 34 суудал ес болтлоо буурсан. Иймээс З.Энхболд Ардчилсан намын даргаас огцорч, хариуцлага хүлээхээ мэдэгдсээр хагас жилийг үдэж байна. Энэ хугацаанд Ардчилсан намыг Д.Эрдэнэбат удирдаж, орон нутгийн сонгуульд чамлахааргүй амжилттай оролцоод байгаа.
З.Энхболдоос тамга тэмдгээ хүлээн авах даргыг харин Ардчилсан намын бүх гишүүдийн саналаар сонгох их сунгаа удахгүй эхэлнэ. Хэрхэн яаж өрсөлдөхийг өнөөдөр эхлэх Ардчилсан намын VI их хурлын 1210 төлөөлөгч шийдэж батална. Үүний дараа Ардчилсан намын дараагийн түүхийг бичих долоо дахь даргыг албан ёсоор сонгох юм. Тэр хүний хамгийн эхний ажил 2017 оны Ерөнхийлөгчийн сонгууль байх болно.