Монгол Улсын Ерөнхийлөгчийн сонгуульд МАХН-аас нэр дэвшигч Н.Энхбаярын хувьд ялтай, ялгүй гэсэн маргаан байгаа. Ялын хугацаа нь дуусгавар болоогүй гэдэг шалтгаанаар 2016 оны УИХ-ын сонгуульд нэр дэвшиж чадаагүй. Зарим эх сурвалжийн хэлж байгаагаар бол ялын хугацаа нь ирэх наймдугаар сард дуусна гэсэн мэдээлэл бий.

Харин энэ талаар СЕХ-ны хэвлэлийн төлөөлөгч Ж.Нэргүйгээс тодруулахад “ Улс төрийн намууд нэр дэвшигчийнхээ материалыг бүрдүүлэхээс гадна нэр дэвшигчдийн өөрсдийн нь бүрдүүлж өгөх материал гэж бий. Энэ нь өр зээлтэй эсэх, ялтай юу зэрэг асуудлаар холбогдох татвар, банк, хууль хяналтын байгууллагуудаас лавлагаа авч өнөөдөр өгөх  ёстой. СЕХ-ны хувьд энэ материалуудыг хүлээж авч шаардлага хангасан эсхийг шалгаж нягтлаад дэвшүүлэх эсэх асуудлаар 14-ний дотор шийдвэр гаргана” гэлээ.