Мексикийн умард нутгийн Сан-Франсиско-де-Кончоса хотын цагдаагийн газрын бие бүрэлдэхүүний 90 хувь нь халагдах өргөдлөө нэгэн зэрэг өгснөөр албан үүрэгтээ үнэнч дөрөвхөн цагдаа л үлдэх болоод байгаа гэнэ. Энэ хотод хүчирхийлэл, аллага газар авсны улмаас цагдаагийн ажилтнууд амь нас, эрүүл мэндээ бодож ийм шийдэл гаргацгаажээ. Зөвхөн сүүлийн нэг сарын хугацаанд гуравхан мянган хүнтэй энэ хотод 12 аллага гарсан нь цагдаагийнхан ийнхүү өөрсдийгөө бодоход хүргэжээ. Аргагүй болсон хотын цагдаагийн газрын дарга холбооны Засгийн газарт хандахад хүрсэн байна.
Энэ бол тус улсад цагдаагийн ажилтнууд халагдах өргөдлөө бөөнөөрөө өгч байгаа анхны тохиолдол биш гэнэ. Өнгөрсөн оны наймдугаар сард Асенсьон хот бас л хэв журам сахиулагчгүй үлдэж байсан аж.
