Хариуцлага нэхэх иргэдийн хөдөлгөөнөөс НИТХ-ын АН, МАН-ын бүлэгт хүргүүлсэн "60 тэрбум"-ын асуудлыг нэн даруй шийдвэрлэх шаардлагын хариугаа нэхэж, өнөөдөр мэдээлэл хийв.
Тус хөдөлгөөнийг санаачлагч Б.Жагар "Долоо хоногийн өмнө НИТХ-ийн дарга Ц.Сандуйг огцруулах шаардлагыг намын бүлгүүдэд шаардлагаа өгсөн. Шаардлагынхаа хариуг нэхэж өчигдөр НЗДТГ-ын өмнө жагсаал хийсэн юм. Гэвч НЗДТГ-ын хаалгыг дотроос нь түгжчихээд онгойлгож өгөөгүй. Тэгээд хаалгыг нь зөөлөн тогшиход хавтас нь салаад уначихсан юм. Үүнээс болж намайг цагдаа нар барьж, байцаасан. Ер нь бол хаалгыг зөөлөн тогшиход унахаар болгоод бэлдчихсэн байх магадлалтай. Өнөөдөр цагдаа нар намайг 10 цагт байцаах ёстой. Би очихгүй. Төрийн албыг цэвэр байлгахын төлөөх тэмцлээ үргэлжлүүлж, өнөөдөр дахин НЗДТГ-ын өмнө очиж, шаардлагынхаа хариуг нэхнэ. 2016 оны УИХ-ын сонгуулийн үеэр нийтэд ил болсон 60 тэрбум төгрөгтэй холбоотой бичлэгийг эвлүүлэг биш гэдгийг гадны шинжээчид нотолсон. Тиймээс төрийн албыг цэвэр байлгахын төлөө НИТХ-ын дарга Ц.Сандуй огцрох ёстой. Ер нь бол төрийн албыг худалдаж, мөнгө олно гэдэг бол эх орноосоо урвасан гэмт хэрэг. Энэ асуудлыг нарийн судалбал одоогийн УИХ-ыг тараах хэмжээний хуулийн зөрчил бий” хэмээв.