-М.Энхболдын оронд У.Хүрэлсүхийг чирэх нь-
Нийслэлийн МАН-ын дарга Ц.Сандуйн зөвлөх, МАН-ын гишүүн А.Ганбаатар анх удаа өөрийн биеэр сэтгүүлчдэд хандан 60 тэрбум төгрөг босгох тухай 90 минутын бичлэгтэй холбоотой мэдээлэл өгөв.
Тэрээр жил гаруй АТГ, цагдаа гэх зэргээр хууль хяналтын байгууллагаар шалгуулж байгаа учраас энэ хугацаанд хэвлэлд хандаагүй. 60 тэрбумыг зөвхөн нийслэлд албан тушаал хуваарилах байдлаар босгох дуулиан тариад байгаа стратеги, санхүүгийн схемийг А.Ганбаатар биш иргэн Г.Доржзодов санал болгосон бөгөөд "Шинэ Монгол Хаад" группийн 4 давхарт уулзалт болсон нь үнэн гэв.
А.Ганбаатар нь иргэн Г.Доржзодовын ил болгоод байгаа 90 минутын бичлэгийг эвлүүлэг хэмээгээд уулзалтанд байсан хүмүүсийн яриа байхгүй мөртлөө байгаагүй хүмүүсийн дуу хоолойг эвлүүлсэн байна. Тэр уулзалтанд нийслэлийн МАН-ын дарга Ц.Сандуй, Шадар сайд У. Хүрэлсүх, МАН-ын Ерөнхий нарийн бичгийн дарга Д.Амарбаясгалан, УИХ-ын гишүүн Л.Оюун-Эрдэнэ нар байсан.Тэд өнөөг хүртэл үг хэлэхгүй байгаа нь сонин байна.
Иргэн Г.Доржзодовын танилцуулсан санхүүгийн схемийг сонссон хүн бүр буруудаж байгаа бол Шадар сайд У.Хүрэлсүх, УИХ-ын гишүүн Л.Оюун-Эрдэнэ, МАН-ын генсек Д.Амарбаясгалан нар ч буруутай. Бидний уулзалтыг баримтжуулсан гэрэл зураг, өөр баримтууд бий. Хуулийн байгууллагаар шалгаж байгаа учраас зарим асуудлыг ярих боломжгүй. Тиймээс хуулийн байгууллага шалгаж,үнэнийг тогтоосны дараа би тодорхой баримт материалууд олон нийтэд дэлгэнэ хэмээн ярьсан юм.