Хэрүүл шуугиан тарин байж УИХ анхдугаар чуулганаа хийлээ. Гэхдээ энэ чуулган хууль ёсных мөн, биш эсэх нь бас л эргэлзээтэй. МАН-ынхан хууль бус чуулган хийсэн гэж АН-ынхан Үндсэн хуулийн цэцэд ховлохоор бичиг цаас бэлдсэн сурагтай. Ингээд Үндсэн хуулийн цэц хоёр намын маргааныг эцэслэнэ. Магадгүй АН-ынхан хууль зөрчиж Анхдугаар чуулган хуралдуулсан байна гэсэн шийдвэр Үндсэн хуулийн цэцээс гарчихвал байдал хаашаа эргэх вэ. Үйл явц ямар байдлаар өрнөх бол. Өчигдөр хийсэн үйлдлээ буцаах уу. Л.Цог гишүүн хуралдаан даргалах гэж чуулганы индэр дээр гарсан буруугаа хүлээж толгойгоо гудайлган зогсч З.Энхболдод өгсөн УИХ-ын тамгаа буцааж аваад л. Ингээд Л.Цог гишүүний оронд Д.Дэмбэрэл гишүүн өмнөх дөрвөн жил хийж байсан албан тушаалдаа буцан очиж З.Энхболдыг УИХ-ын даргад батламжлах асуудлыг хэлэлцэхээр гишүүдийн ирцийг бүрдүүлнэ. Энэ үед нь аягүй бол АН-ынхан эсэргүүцээд хуралдаандаа суухгүй гэж бас хэдэн өдрийг үдэх. Энэ хооронд нь МАН-ын гишүүд АН-ынхан хуралдаандаа суу. УИХ-ын даргаа сонгоё, манай нам УИХ-д бүлэг байгуулж, УИХ-ынхаа дэд даргыг сонгомоор байна гэж шаардаад л. Гэтэл АН-ынхан “Үгүй манай намын гишүүд чуулганы хуралдаанд суухгүй. Манай намынхан ИЗНН, “Шударга ёс” эвслийнхэнтэй нийлээд УИХ-ын даргаа томилчихсон, УИХ-д албан ёсны бүлгээ байгуулчихсан. “Шударга ёс” бүлэг ч мөн албан ёсоор байгуулсан. Тиймээс Д.Дэмбэрэл гишүүнээр чуулган удирдуулахыг зөвшөөрөхгүй” гэж хэлэх болов уу. Мөн үүнээс гадна танай намынхан төрийн үйл хэргийг хэвийн үргэлжлүүлэх боломж олгож Байнгын хорооны хуралдаандаа суу. Ер нь танай нам л бүлгээ байгуулаагүй байгаа шүү. Бидний үгэнд орж З.Энхболд даргад бүлэг байгуулах саналаа өг. Тэгвэл танай нам ч гэсэн УИХ-д дэд даргаа сонгох боломжтой. Үүнээс өөр гарц танайд байхгүй гэсэн үг чулуудна.
Харин Д.Дэмбэрэл “Би та нарыг намайг нэг л өдөр хүлээчих, намынхаа Бага хуралд суучихаад маргааш нь анхдугаар чуулганаа даргалах гэж байсан. Та нар л яараад ийм хууль зөрчсөн зүйл хийчихлээ. З.Энхболд оо чи хүрээд ир би чамд УИХ-ын ахмад гишүүний хувиар тамга тэмдгийг чинь өгье” гээд сургамж хэлж, хууль ярих биз. Ингэхээр нь З.Энхболд “УИХ-ын тамгыг нэг чуулганы хугацаанд хоёр удаа авна гэсэн хуулийн заалт байхгүй. Өмнө нь авсан тамгаа дахин та нарт өгөхгүй шүү” гэж зөрүүдлээд л. Ийм маягаар УИХ-ын гишүүн Д.Дэмбэрэл УИХ-ын дарга З.Энхболдтой суудал булаацалдаж зусах вий дээ. Ингээд АН, МАН-ын гишүүд тус бүртээ хуралдаж, өдөрт 2-3 удаа чуулган хуралдуулах зар тараана. Үүнээс гадна З.Энхболдын байгуулсан УИХ-ын тамгын газрын баг ажиллаад л нөгөө талд Д.Дэмбэрэлийн данстай Тамгын газрын ажилтнууд УИХ-ын үйл ажиллагааг зохион байгуулж чуулганы зарыг өөр өөрсдийн хүссэн цагтаа зарлаж сэтгүүлчдийг баахан чирэгдүүлэх вий дээ.
