Өчигдөр 03 цаг 50 минутын үеэр Ховд хотыг хангах цахилгаан дамжуулах шугамд гэмтэл гарсны улмаас цахилгааны хэрэглээг түр хязгаарлажээ. Тухайлбал, Мянгад дэд станцаас Ховд аймгийг тэжээж байгаа 35 кВ-ын 2 хэлхээт цахилгаан дамжуулах агаарын шугамын бетонон тулгуурыг хүнд даацын авто машин мөргөснөөр гэмтэл үүсч цахилгаан эрчим хүчний хангамжид түр саатал гарсан байна.
Уг гэмтлийг засварлахаар Ховд аймгийн Засаг даргын тамгын газрын дарга Б.Ганболдоор ахлуулсан ажлын хэсэг, “ББЭХС” ТӨХК, “Ховд ЦТС” ХХК, Ховд аймгийн Онцгой байдлын газар, Цагдаагийн газар, Зэвсэгт хүчний 123 дугаар анги хамтран ажиллаж байгаа аж.
Газар хөлдсөн байгаа энэ үед уг шугамыг газрын гүнд 3м-т суулгах ёстой учраас газар ухах асуудал хүндрэлтэй байгаа юм. Дугуй шатааж, мөн гараар ухах зэргээр гэмтэл засварыг яаралтай хийж дуусгахаар холбогдох албаныхан ийнхүү ажиллаж байна. Одоогоор 1м гаруй гүн ухаад байгаа бөгөөд маргааш үдээс хойно гэхэд гэмтэлийг засварлаж, шугамаа суулган цахилгааныг хэвийн дамжуулахаар шуурхайлан ажиллаж байна.
Тиймээс уг гэмтэл саатлыг засварлахтай холбоотой 1 сарын 18-наас 19-ний өдрүүдэд түр хугацаагаар Цахилгаан Эрчим Хүч хязгаарлахыг “Ховд ЦТС” ХХК-ны зүгээс албан ёсоор мэдэгджээ.
