МАН-ын дарга Ө.Энхтүвшин, УИХ-ын гишүүн Ц.Нямдорж нар намаа төлөөлж шинээр томилогдсон УИХ-ын дарга З.Энхболдтой уулзлаа. Уулзалтын үеэр МАН-ын удирдлагуудын хувьд чуулганы хуралдааныг үргэлжлүүлж, УИХ-ын даргаа сонгосон нь хууль бус гэдгийг илэрхийлжээ. Цаашид хоёр намын бүлэг ажлын хэсэг зөвшилцөх шаардлагатай байна гэдгийг ч МАН-ынхан мэдэгдсэн байна.
Ө.Энхтүвшин дарга “Өвөрхангайн хоёр мандатын асуудлыг түргэн шийдвэрлэх хэрэгтэй байна. Хоёр гишүүнийг хурдан тангаргийг нь өргүүлэх хэрэгтэй. Мөн Архангай, Хэнтий, Улаанбаатар хотын Сүхбаатар, Чингэлтэй дүүрэгт санал тооллогыг гараар явуулахад анхаарах хүсэлтээ З.Энхболд даргад хэллээ. Үүнтэй холбоотойгоор хоёр талаасаа ажлын хэсэг гаргахаар болсон” хэмээн сэтгүүлчдэд хэлсэн юм.
МАН-ын хувьд Үндсэн хуулийн цэцэд хандсан байгаа. Хэрэв хоёр нам ойлголцож чадвал Үндсэн хуулийн цэцийн дүгнэлтийг хүлээхгүйгээр ажилдаа шамдана гэдгээ ч МАН-ын дарга хэллээ.