МАН-ын дарга Ө.Энхтүвшин, УИХ-ын гишүүн Ц.Нямдорж нар намаа төлөөлж өнгөрсөн баасан гарагт УИХ-ын дарга З.Энхболдтой уулзсан юм.
МАН-ын дарга Ө.Энхтүвшин уулзалтын дараа сэтгүүлчдэд “Манай намын гишүүдгүйгээр чуулганы хуралдааныг үргэлжлүүлж, УИХ-ын дарга сонгосон нь хууль бус гэсэн байр суурьтай байгаагаа уулзалтын үеэр УИХ-ын даргад илэрхийллээ. Өвөрхангайн хоёр мандатын асуудал шийдвэрлэгдэхгүй байгаа. Шүүхийн процессыг түргэлүүлэх хэрэгтэй байна. Хоёр хүнийхээ тангаргийг нь өргүүлмээр байна. Хэрэв та УИХ-ын даргад албан ёсоор сонгогдсон юм бол үүнд онцгой анхаарал тавиач гэсэн. Мөн Архангай, Өвөрхангай, Хэнтий аймаг, Улаанбаатар хотын Сүхбаатар, Чингэлтэй дүүрэгт саналын хуудсыг гараар тоолъё. Энэ ажлыг даруйхан шиг хийх талаар анхаарах хэрэгтэй байна гэсэн санал тавьсан. Үүнд УИХ-ын даргатай санал нэгдлээ. Ийм гурван зүйлийн тухай ярилцаад хоёр талаас ажлын хэсэг гаргаж, ажиллахаар тохирлоо” хэмээн ярьсан.
Энэ үеэр МАН-ын шинэхэн дарга сэтгүүлчдийн сонирхсон асуултад ийн хариуллаа.
-УИХ-д танай нам бүлэг байгуулах боломжгүй боллоо гэх юм?
-Тийм зүйл байхгүй.
-Ямар хуулийн заалт үндэслэж ингэж хэлж байна вэ?
-УИХ-ын дарга хууль бусаар сонгогдсон. Тиймээс бид Үндсэн хуулийн цэцэд хандсан байгаа.
-Уг нь, УИХ-ын тухай хуулиар УИХ-ын дарга сонгогдсоны дараа 24 цагийн дотор намууд бүлэг байгуулах саналаа өгөх ёстой. Гэтэл танай нам саналаа өгөөгүй шүү дээ?
-Бид 24 цагийн дотор багтаад Үндсэн хуулийн цэцэд хандсан.
-Зарим хуульч чуулганы хуралдааныг үргэлжлүүлж, УИХ-ын даргаа сонгосон нь Үндсэн хууль зөрчөөгүй гэж үзэж байна билээ?
-Тэрийг мэдэхгүй. Холбогдох газар нь шийдвэрээ гаргаад, хариу өгнө байх.
-Тэгвэл танай намынхан ҮХЦ-д хандахдаа Үндсэн хуулийн ямар заалтыг зөрчсөн гэж үзсэн юм бэ?
-Хууль дээдлэх зарчим гэж байгаа. Энэ дагуу хандсан.
-Хэрэв цэц маргаан үүсгэхгүй бол яах вэ?
-Мэдэхгүй. Тэр бол цэцийн асуудал.
-Цэцийн дүгнэлт гартал МАН-ынхан чуулганы хуралдаанд оролцохгүй гэж ойлгож болох уу?
-Яахав, хоёр талын ажлын хэсгийнхэн ажиллаад, ойрын хугацаанд түрэгхэн шиг ойлголцчихвол цэцийн дүгнэлтийг хүлээх албагүй.
-Хэрэв зөвшилцөлд хүрэхгүй бол танай намынхан цаашид яах вэ?
-Зөвшилцөлд хүрнэ. Ойлголцоно. Аль ч нам олонхи болоогүй. Ард түмний сонголт энэ. АН 31, МАН 27 суудал авснаас хоёрыг нь одоогоор тангараг өргүүлэхгүй байна. “Шударга ёс” эвсэл 11 суудалтай. Тэгэхээр аль нь ч олонхи болоогүй. Ийм тохиолдолд улс төрийн намуудыг хоорондоо зөвшилц, ойлголц, төрийн ажлаа хий гэж ард түмэн хэлж байна шүү дээ. Манай намынхан ч ийм байр суурьтай байгаа.
-АН бусад нам, эвсэлтэй эвсч УИХ-д олонхи бүрдүүлснийг бас хууль бус гэж үзэж байгаа хэрэг үү?
-Бусад намтай зөвшилцөнө гэж хуульд заасан болохоос зарим намтай зөвшилц, заримтай нь битгий зөвшилц гэсэн үг байхгүй. Энэ заалтыг зөрчсөн. Заавал бичгээр хариу авч зөвшилцлийг дуусгах ёстой. Үүнийг ч зөрчлөө. Дараа нь, УИХ-ын даргыг сонгох хүртэл хугацаанд хуралдааныг насаар хамгийн ахмад нь даргална. Гэтэл УИХ-ын насаар хамгийн ахмад Дэмбэрэл гишүүн эв эрүүл, сав саруул, ордонд байсаар байтал, Цог гэдэг хүнээр хуралдаан даргалуулсан нь хууль бус.
-Танай нам зөвшилцлийн хариуг хурдан өгөх боломж байгаагүй юм уу?
-Өнгөрсөн мягмар гарагт манай намын Бага хурал болж байсан. Бага хурлаа дуусгаад, лхагва гаригт хариугаа өгье л гэсэн шүү дээ.
-Танай нам төр байгуулах үйл хэрэгт идэвхгүй, санаачилгагүй оролцсон учир ийм байдал үүссэн гэж тайлбарлах хүн ч байна. Үүнд та ямар хариулт өгөх вэ?
-Хамгийн их санааччилга гаргах ёстой нь олонхи болсон тэр хүчин. Олонхи болоогүй бол хамгийн олон суудал авсан хүчин санаачилга гаргах ёстой. МАН-ын хувьд санаачилгатай хандаж, хуулиа ч мэдэж байгаа. Хуулийн дагуу ажлаа хийе гэсэн болохоос төрийн ажлыг гацаая гэж хэлээгүй. МАН төрийн ажлыг гацаахгүй. Та нар яагаад заавал манай намыг буруутай юм шиг яриад байгаа юм бэ. Бидний бичгийг авахад хэдхэн цаг л хангалттай байсан шүү дээ. Бид бичгээ өгөхөөр бэлэн болгосон байсан. Гэтэл тэрийг хүлээлгүйгээр өнгөрсөн мягмар гарагт олонхи бүрдүүлчихлээ гээд хуралдаан зарлаж, УИХ-ын даргаа сонгосон. Тиймээс үүнээс хойш гаргасан шийдвэрүүдийг хүчин төгөлдөр гэж үзэхэд хэцүү.
-Тэгэхээр УИХ-ын даргыг томилох ажил дахиад эхнээсээ хийгдэнэ гэсэн үг үү?
-Мэдэхгүй. Бид ярилцаж байна.
-Гурван аймаг, нийслэлийн хоёр дүүрэгт саналын хуудас дахин тооллоо гээд сонгуулийн дүнд өөрчлөлт гарах болов уу. Яагаад энэ тойргуудыг сонгосон юм бэ?
-Хамгийн их эргэлзээтэй байгаа тойргууд. Тэрнээс биш бүх хэсэгт саналын хуудас дахин гараар тоолъё гээгүй. Энэ таван газарт саналын хуудсаа гараар тоолоод нягталъя л гэж байгаа юм. Хяналтын тооллого хийгээд, үнэхээр машинаар болон гараар тоолсон дүн нийлж байвал маргаж, эргэлзэж байгаа улс нь мэдэгдэл хийе. Санал тоолох машинд эргэлзэх хэрэггүй юм байна шүү гэж. Энэ эргэлзээгээ л тайлъя. Автомат машинаар Ерөнхийлөгчийн сонгууль, дараа дараагийн сонгуулийн санал хураалтыг тоолно. Эргэлзээтэй байх юм бол сонгуулийн дүнг хүлээн зөвшөөрөхгүй байх явдал гарна. Энэ талаар бодож, УИХ-ын даргад санал тавьсан юм.