Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн дагуу төрийн албан тушаалтнууд хөрөнгө, орлого болон хувийн ашиг сонирхлын тухай мэдүүлгээ АТГ-т дахин бүрдүүлж өгөх үүрэгтэй болсон. Шинээр сонгогдсон парламентын гишүүд энэ үүргээ биелүүлсэн эсэхийг АТГ-ын Хяналт шалгалт, дүн шинжилгээний хэлтсийн Хяналт шалгалтын албаны дарга Л.Сүх-Очироос тодруулахад,
-Төрийн албан тушаалтнуудаас хөрөнгө орлогын болон хувийн ашиг сонирхлын зөрчлийн тухай мэдүүлэг авах ажил ид өрнөж байна. Тэднээс ийм мэдүүлэг авах хуулийн хугацаа дуусах болоогүй. Наймдугаар сарын 15-нд дуусна. Тухайн үед нь бид энэ талаархи бүх мэдээллийг нэгтгэж, олон нийтэд хүргэх болно.
-Янз бүрийн чиглэлээр үйл ажиллагаа явуулдаг төрийн бус байгууллага, эвлэлийн тэргүүн, ерөнхийлөгчийн албан тушаалыг давхар хашиж буй хүн УИХ-ын шинээр сонгогдсон гишүүд дунд байна. Тэд энэ албан тушаалаа бусдад шилжүүлэн өгөх ёстой юу?
-Энэ асуудлыг бид хуулийн хүрээнд судалж байна. Тэгээд шийдвэрээ гаргана. Тиймээс одоохондоо мэдээлэл өгөх боломжгүй.