Шинэ Засгийн газар хамтарч байгуулагдах нь тодорхой болсон. МАХН-МҮАН-ын “Шударга ёс” эвсэлтэй хамтарахаа илэрхийлсэн боловч парламентад суудалтай МАН-аас гуйлга ирж байгаа аж. Гуйлганд Ц.Нямдорж, У.Хүрэлсүх нар хамтарсан Засгийн газарт орж ажиллах хүсэлт тавьжээ. Тэд “Шударга ёс” эвсэлтэй хамтарч ажиллахгүй, МАН-ыг сонгох санал тавьсан байна. Тэр тусмаа Ц.Нямдорж ХЗДХЯ-ыг авах саналаа илэрхийлж, намынхаа тодорхой тооны хүмүүсийг албан тушаалд томилуулах хүсэлт хэлсэнд АН-ын зарим гишүүд дургүйцэж буй гэнэ. МАН-ын нэр бүхий гишүүд МАХН руу орох сураг гарч байсан. Хүнд байдалд байгаа МАН-ынхан Р.Раш, Д.Арвин, Д.Загджав тэргүүтэй гишүүдээ МАХН руу алдчихгүйн тулд намынхаа гишүүдэд МАН удахгүй АН-тай хамтарч Засгийн газар байгуулна. Тэгэхээрээ та нарт албан тушаал өгнө хэмээн аргацааж байгааг эх сурвалж хэлж байна. Нэгэнт хадаг сүйгээ МАХН-МҮАН-ын “Шударга ёс” эвсэл, ИЗНН-д тавьчихаад байхад АН-ынхан МАН-ын саналыг хүлээж авахгүй нь бололтой. АН-ынхны ихэнх гишүүн МАН-тай хамтрах боломжгүй гэсэн байр суурьтай байгаа ч гэсэн мэдээлэл байгаа юм.Тиймээс үдээс хойш болох “Шударга ёс” эвслийн Удирдах зөвлөлийн шийдвэр гарсны дараа хамтарсан Засгийн газар байгуулах АН болон эвслийн хамтарсан ажлын хэсгийн хурал товлогдож магадгүй нь.