УИХ-ын чуулганы нэгдсэн хуралдаанаар Засгийн газрын бүтэц, Засгийн газрын бүрэлдэхүүний тухай хуулийн төслүүдийн анхны хэлэлцүүлгийг хийж олонхийн саналаар баталлаа. Ийн засгийн газрын бүтэц бүрэлдэхүүнийг чуулганаар баталсанаар өнөөдрөөс эхлэн Монгол Улсын Засгийн газар 16 яамтай, 19 сайдтайгаар үйл ажиллагаагаа явуулна. Харин дээрх хоёр төсөлтэй хамт өргөн мэдүүлэгдсэн Засгийн газрын тухай хуульд өөрчлөлт оруулах тухай хуулийн төслийг УИХ-ын Төрийн байгуулалтын байнгын хорооны хуралдаанаар хэлэлцэх шатанд 16 орчим саналын томъёоллоор санал хураалгаж, дэмжлэг хүлээсэн байсныг нэг бүрчлэн чуулганы нэгдсэн хуралдаанд оролцсон гишүүдийн саналыг авч дэмжүүллээ. Тухайлбал, Ерөнхий сайдын эрхлэх асуудлын хүрээнд төрийн болон орон нутгийн өмчийн хөрөнгөөр бараа, ажил үйлчилгээ худалдан авах асуудал харьяалагдах байсныг хасч, оронд нь Шадар сайдын эрхлэх асуудлын хүрээнд нэмж тусгахаар болсон нь гишүүдээс дэмжлэг хүлээлээ.
