Шинэчлэлийн гэх тодотголтой Н.Алтанхуягийн тэргүүлсэн Засгийн газар бүрдээд ажилдаа орлоо. Шинэ сайд нар харьяа агентлагийн үйл ажиллагаатай танилцаж, хурган дарга нартайгаа нүүр тулан уулзаж эхэллээ.
Энэ Засгийн газрын хувьд Монгол Улсын хөгжлийг тогтвортой биш үсрэнгүй хөгжилд хүргэнэ гэдгээ илэрхийлээд байгаа. Иргэд ч тэднээс их зүйлийг хүлээж буй нь мэдээж. Гэтэл зарим сайдтай холбоотой таагүй мэдээлэл олон улсын хэвлэл мэдээллийн хэрэгслээр цацагдаж эхэллээ. Тухайлбал, Уул уурхайн сайдаар томилогдсон Д.Ганхуягийг гадаадын хөрөнгө оруулагчид тийм ч таатай бусаар хүлээж авахгүй байгаагаа илэрхийлж. Түүнийг Оюутолгойн 51 дээшгүй хувийг Монголын тал авах ёстой гэсэн байр сууринаас болж гадаадынхан ийн жийрхэж байгаа нь бололтой. Энэ мэтээр саар мэдээлэл дагуулж байгаа ч сайн мэдээ гэвэл иргэд аль ч яамны сайдтай уулзаж өргөдөл гомдлоо хэлж ярихад амар хялбар болж. Учир нь, энэ удаагийн Засгийн газрын сайд нар өдөр болгон хоногийн тал илүүг яаман дээрээ өнгөрөөх болж. Түүгээрч барахгүй амралтын өдөр ч яаман дээрээ л сууж байх нь. Мэдээж сайд ажиллаж байхад яам түүний харьяа агентлагийн хурган дарга, цэргүүд нь хамт л ажиллана гэсэн үг. Тэгэхээр иргэдийн тавьсан асуудлыг төдийлэн шийддэггүй байсан хүнд сурталтнууд амралтын өдөр хүртэл ажиллах нь. Тиймээс та өөрийн хөөцөлдсөн ажлаа ажлын таван өдөрт багтааж чадаагүй бол хагассайнд яваад очоорой. Сайд, газрын дарга, хэлтсийн дарга, мэргэжилтнүүд бүгд л ширээнийхээ ард танд туслахад бэлэн гээд хүлээж байна байх. Тийм ч байхыг Засгийн газрын тэргүүн сайд нартаа тамга тэмдэгийг нь хүлээлгэж өгөхдөө захиж, гэрээ байгуулж. За тэгээд дурьдаад байвал олон заалт бий. Тухайн салбарын яамыг өөрийнхөө нэр хүндэд ашиглахгүй, шоудахгүй, согтохгүй, шогтохгүй гээд л нарийн ширийн заалт бий. Энэ бүхнийг тайлбарлаж байхын оронд Шинэчлэлийн Засгийн газрын тэргүүн шинэ сайд нартай хэрхэн гэрээ байгуулсныг танд сонирхуулъя.