Манай улс Үндсэн хуульд иргэдээ ялгаварлан гадуурхахгүй гэдгээ тунхагласан заалт бий. Гэвч амьдралд “эцэг хууль”-ийн эл заалт хэрэгждэггүй. Иргэддээ ялгавартай хандаж ирсэн жишээ ч цөөнгүй. Тухайлбал, эмэгтэй хүн 55, эрэгтэй хүн 60 настайдаа тэтгэвэрт гардаг. Энгийн иргэдийн хувьд тэтгэвэрт гарах насанд хүртлээ махийтлаа ажиллаж, нийгмийн даатгал төлсөн байдлаараа тэтгэврээ тогтоолгодог. Гэтэл цагдаа, цэргийн албан хаагчдад энэ хууль үйлчилдэггүй. Тэд 25 жил ажилласан л бол тэтгэвэрт гарч болно. Тэтгэвэрт гарахад нь Цэргийн албан хаагчийн тэтгэвэр, тэтгэмжийн тухай хуульд зааснаар бол 36 сарын цалин хөлстэй тэнцэх хэмжээний нэг удаагийн тэтгэмж олгож, төр “энхрийлдэг”. Өөрөөр хэлбэл, иргэдээ албан тушаалаар нь ялгаварлан гадуурхаж байна гээд хэлчихэд дэгсдүүлсэн болохгүй.
Энэ мэт байдлаас үүдэн Цэргийн албан хаагчийн тэтгэвэр, тэтгэмжийн тухай хуульд нэмэлт, өөрчлөлт оруулахаар төлөвлөж байгаа гэнэ. Тодруулбал, нэг удаагийн тэтгэмж олгох тухай заалтыг хуулиас хасах сурагтай. Нөгөөтэйгүүр ирэх оноос Төсвийн тогтвортой байдлын тухай хууль хэрэгжиж эхлэхтэй холбогдуулан санхүүжилтийн эх үүсвэр тодорхойгүй байгаагаас тэтгэвэрт гарах цагдаа, цэргийн албан хаагчдад тэтгэмж олгохгүй болох магадлал ч байгаа гэдгийг албаныхан дунд хэлэх нэгэн ч байна. Цагдаа, цэргийн албан хаагчид тэтгэвэрт гарсан тохиолдолд цолноосоо хамаарч авах тэтгэмжийн хэмжээ өөр өөр байдаг гэнэ. Жишээ нь, хурандаа цолтой тэтгэвэрт гарсан тохиолдолд 10 орчим сая төгрөг нэг удаагийн тэтгэмж болгон авдаг байна. Төрөөс хүүхдэд сар бүр 20 мянган төгрөг олгож байхаар шийдвэрлэсэн. Дээрх 10 сая төгрөгөөр 500 мянган хүүхдийн нэг сарын 20 мянган төгрөгийг олгож болохоор байна.
