“Ард түмэнд нээлттэй нам” гэж тунхаглаад байгаа МАН-ынхан Орон нутгийн сонгуульд өрсөлдөх нэр дэвшигчдээ тодруулж дуусчээ. Нэр дэвшигчдээ тус намынхан жирийн гишүүд дэмжигчдээрээ хэлэлцүүлэн тодруулсан байна.
Харин тодруулсан хүмүүсийг намын хяналтын хороогоор хэлэлцэж хянан батлах гэнэ. Тус намынхан Орон нутгийн сонгуульд “Олны тусын төлөө” гэсэн зарчмыг гол уриа лоозон болгож оролцох аж. Ингэхдээ МАН ялсан тойрог бүрт тухайн сум, баг, хорооны Засаг даргыг ард иргэдээс нь сонгоно гэдгийг МАН-ын ерөнхий нарийн бичгийн дарга Г.Занданшатар мэдэгдлээ. Өөрөөр хэлбэл, сум, хорооны Засаг даргыг ард иргэдээс хэлэлцүүлэн итгэл даах хүнийг сонгох юм байна. Харин багийн Засаг даргыг сумын Засаг дарга томилдог болно гэнэ. МАН Орон нутгийн сонгуульд оролцохын өмнө намынхаа албад, хэлтсийн дарга нарыг сольж, шинэ эрч хүчтэйгээр оролцох гэнэ. Удирдах зөвлөлийн Хэрэг эрхлэх газрын даргаар Ш.Раднаасэд, Хэвлэл мэдээлэл олон нийттэй харилцах хэлтсийн даргаар Б.Хажидмаа, Мэдээлэл технологийн хэлтсийн даргаар Б.Цогтгэрэл, Намын байгуулалтын хэлтсийн даргаар Ч.Жаргалсайхан, Улс төрийн бодлогын хэлтсийн даргаар Н.Дэмбэрэл нар томилогдсон байна. Мөн төрийн албанаас чөлөөлөгдсөн залуус МАН-ын гишүүнчлэлээ сэргээж байгаа аж.