Энэ оны Нобелийн Энхтайвны шагналыг Европын холбоонд өгөхөөр болсон билээ. Европын холбоо гэдэг олон улс багтсан нүсэр том байгууллага болохоор аль улсын хэн очиж шагналаа гардаж авах нь нэлээд ээдрээтэй асуудал. Европын холбоо дотроо зөвлөлдөө өөрийн гурван гол институтийнхээ төлөөлөгчдийг явуулахаар болжээ. Эдгээр нь Еврокомиссын тэргүүлэгч Жозе Баррозу, Европын зөвлөлийн ерөнхийлөгч Херман Ван Ромпей, Евро парламентын тэргүүлэгч Мартин Шульц нар юм. Гэхдээ ёслол дээр шагнал авсан талаас нэг л хүн үг хэлдэг. Тэгэхээр арванхоёрдугаар сарын 10-нд Осло хотноо болох ёслолын ажиллагаан дээр энэ гурвын хэн нь үг хэлэх нь тодорхойгүй байгаа аж. Мөн шагналыг дагалдан ирдэг урамшуулал 1,1 сая еврог юунд зарцуулахаа тодруулаагүй байна.Европын холбоо нь дайн тулаантай тивээс удаан хугацааны турш энхтайван хөгжсөн тив болгосон гэж Нобелийн шагнал өгсөн юм. Дайны гал гэж ерээд онд Балканы хойгт, хуучин Югославын бүрэлдэхүүн улсуудын хооронд болсон тулааныг хэлж байгаа бололтой.
