АТГ-т иргэдээс Баянгол дүүргийн герман хэлний гүнзгийрүүлсэн сургалттай 38 дугаар сургуулийн математикийн багш Л.Мижигмаа сурагчдаас хандив авч байгаа тухай гомдол иржээ. Тус газрынхан уг гомдлын мөрөөр ажиллаж, багш Л.Мижигмаа хууль бусаар хандив цуглуулж, хөндлөнгийн хяналтгүй зарцуулж байсныг тогтоосон байна. Тиймээс энэ сургуульд гарсан зөрчлийг арилгуулах, буруутай албан тушаалтанд хариуцлага тооцох, дахин ийм төрлийн зөрчил гаргуулахгүй байхад анхаарч ажиллахыг хүссэн албан бичгийг Баянгол дүүргийн Засаг даргад хүргүүлжээ. Тус дүүргийн Засаг даргын Тамгын газраас ирүүлсэн хариу албан бичигт 38 дугаар сургуулийн багш Л.Мижигмаад сануулах арга хэмжээ авсан гэнэ.
АТГ Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн хэрэгжилтэд хяналт тавьж ажиллаж байгаа. Бүх шатны сургууль, цэцэрлэгт суралцагчдаас хууль бус хандив цуглуулах, үндэслэлгүй төлбөр авсан талаарх гомдол, мэдээллийг хүлээн авч, хяналт шалгалтын ажил явуулж байна. Тиймээс цаашид сургууль, цэцэрлэгүүд хууль зөрчсөн аливаа үйлдэл гаргахгүй байхыг тус газраас анхааруулж байна.
