“Hero entertainment” студиэс эрхлэн гаргадаг “Монгол тулгатны 100 эрхэм” нэвтрүүлэгт саяхан Холливудын кино од Стивен Сигал оролцсон. Америкийн кино од, буддын шашины ренбүчи Стивен Сигалийн хувьд монгол цустай хэмээн энэ нэвтрүүлгээр танилцуулсан. Хэдийгээр тэрээр өөрийгөө Монголд төрж өсөөгүй ч түүний өвөг эцэг нь Монгол хүн байсан гэж ярьсныг уншигчид та бүхэн үзсэн байх. Энэ нэвтрүүлгийг үзсэн хүмүүс янз бүрийн саналтай байгаа нь дамжиггүй. Нэвтрүүлэгт оролцуулах “олигтой” хүн олдсонгүй юу гэж шүүмжилж байхад Монгол туургатан гэдэг дээвэр дор нэгдэж байгаа ийм хүмүүсээ хүндлэх хэрэгтэй ч гэх.
Түүнчлэн Монголын уул уурхайг сонирхож ирсэн Оросын хоёр тэрбумтны хамт Стивен Сигалийг Монголд ирэхэд нь энэ нэвтрүүлгийн зураг авалтыг хийсэн гэнэ. Монголчууд онлайнаар “Энэ нэвтрүүлэгт оролцуулах хүн байхгүй болчихсон. Дараагийнх нь Жэки Чан байх нь” ч гэж хошигнож байна.
Үнэхээр Монгол Улсад маань энэ нэвтрүүлгийн “зиндаа”-нд тохирохоор хүн байхгүй болчихсон гэж үү. Таны бодлоор энэ нэвтрүүлэгт хэнийг оролцуулмаар байна вэ. Та Монгол Улсынхаа нэр цуутай, хэн нэгийг энэ нэвтрүүлэгт уримаар байгаа бол өөрийн хүндэтгэдэг хүмүүсийнхээ нэрийг бичиж илгээгээрэй. Үүгээрээ бид хэн нэгнийг муулах гэсэнгүй. Зөвхөн Монгол Улсынхаа тусгаар тогтнол, Үндэсний аюулгүй байдалд өөрийн хувь нэмрээ оруулж, монгол хүний үнэ цэнэ, үнэлэмжийг нэмэгдүүлэхийг хүсч байна. Таны санал хамгийн чухал юм. Та идэвхтэй оролцоорой.