Өнөөдөр УИХ-ын чуулганы нэгдсэн хуралдаан болж гишүүнээсээ чөлөөлөгдөх өргөдөл өгсөн У.Хүрэлсүхийн оронд намын жагсаалтаар орж ирж байгаа МАН-ын нарийн бичгийн дарга Д.Сарангэрэлийг тангараг өргүүлнэ. Мөн УИХ-ын сонгуулиар Өвөрхангай аймгийн 10 дугаар тойрогт нэр дэвшин өрсөлдсөн Г.Батхүү, Д.Зоригт нар тангараг өргөх мэдээ байна. Өвөрхангай аймгийн шүүх энэ сарын 20-нд хуралдаж олонхийн санал авсан МАН-ын гишүүн Г.Төмөрхүү, С.Чинзориг нар нь сурталчилгаандаа насанд хүрээгүй хүүхэд оролцуулсан гэдгийг тогтоосон юм байна.
Харин МАН, МҮАН-ын “Шударга ёс” эвслийн намын жагсаалтаар өмнө нь УИХ-ын гишүүн асан Д.Оюунбаатар тангараг өргөх ёстой ч энэ асуудал хараахан шийдэгдээгүй байгаа юм.
УИХ-ын чуулганы нэгдсэн хуралдаан өчигдөр болох байсан ч гишүүд орон нутгийн сонгуулиар хөдөө орон нутагт ажиллаад амжиж ирээгүй байсан учраас ирц хүрэлгүй хойшилсон юм.