Сонгинохайрхан дүүргийн МАН-ын хорооноос хэвлэлийнхэнд хандаж мэдээлэл хийлээ. 2012-2016 онд Сонгинохайрхан дүүрэгт МАН боловсруулсан мөрийн хөтөлбөрөө хэрэгжүүлж, Засаглалаа байгуулах боломжтой болсон гэдгээ албан ёсоор зарлав. Тус дүүрэгт ИТХ-ын 41 мандаттай. Үүнээс 22 суудлыг нь МАН-ын төлөөлөгчид аваад байгаа аж. Тиймээс ирэх дөрвөн жилд дүүргийн хөгжилд дэвшилд хүргэх мөрийн хөтөлбөрөө хэрэгжүүлэх боломж бүрдсэн гэдгийг тус дүүргийн МАН-ын хорооны дэд дарга Х.Нямбаатар, Н.Алтаншагай нар хэлсэн юм.
Мөн тэд сонгуулийн үеэр Сонгинохайрхан дүүргийн АН-ынхны хийсэн булхай луйварын талаар баримт дэлгэсэн юм. Тухайлбал, ЕБС-ийн хоёрдугаар ангийн багш санал хураалт явуулахын өмнө “Маргааш сонгуулийн баярын өдөр. Нэр дэвшигч Цэвээн-Очирыг дэмжээрэй. Ар гэрийнхэндээ хэлээрэй” хэмээн дэвтэр дээр нь тэмдэглүүлжээ. Мөн тус дүүргийн Хөдөлмөр халамж үйлчилгээний хэлтсийн ажилчид Засгийн газраас хэрэгжүүлж байгаа хямд нүүрсний судалгаа авч байгаа нэрийдлээр айл өрхөөр явж, ам бүлийн тоо, сонгуулийн насны иргэдийн тоо, утасны дугаарын бүртгэл хийжээ. Түүнчлэн АН-д санал өгвөл хямд нүүрс 4-5 шуудайг гэрээр нь хүргэж өгнө гэхчлэн сонгогчдын саналд нөлөөлөхийг оролджээ. Мөн өрхийн эмч нар “Цусны даралт, чихрийн шижин илрүүлэх үзлэгт хамрагдана уу” хэмээн зар тарааж, иргэдэд үнэ төлбөргүй үзлэг хийжээ. Энэ бүхэн нь хууль зөрчсөн үйлдэл хэмээн МАН мэдэгдэж байна. Тодорхой хэлбэл, сонгуулийн дахин санал хураалт явуулахад улс төрийн намууд сонгуулийн сурталчилгаа явуулах ёсгүй. Тиймээс энэ мэтээр хууль зөрчсөн зүйлүүдийг баримтжуулж, хууль хяналтын байгууллагад хүргүүлж байгаагаа тэд мэдэгдсэн юм. Харин тус дүүргийн АН-аас өмнө нь МАН-ын таван нэр дэвшигчийг хууль хяналтын байгууллагад шалгуулж байгаа гэсэн мэдээлэл өгч байсан. Тэгвэл үүнийг ор үндэсгүй, гүтгэлэгийн шинжтэй мэдээлэл гэдгийг тэд хэлсэн юм. Одоогийн байдлаар таван нэр дэвшигчид эрүүгийн хэрэг үүсгэсэн зүйл байхгүй гэв.