Бороо Гоулд ХХК “Шилдэг эко уурхай” шагнал хүртлээ

Уул уурхайн салбарын шилдгүүдийг тодруулдаг Mining Journal Awards -2012 шалгаруулалтын Шилдэг Эко Уурхай шагналыг Бороо Гоулд ХХК хүртлээ.
“Байгаль орчиндоо ээлтэй уул уурхайн үйл ажиллагаа явуулж Монгол улсын хөгжилд өөрийн хувь нэмэрээ оруулж болдогийг манай үйл ажиллагаанаас харж болох юм” гэж Бороо Гоулд ХХК-ийн Ерөнхийлөгч бөгөөд Гүйцэтгэх захирал Жон Казакофф энэхүү шагналыг гардан авах үедээ хэлсэн юм.

Бороо Гоулд ХХК-ийн байгаль орчны хэлтэс нь уулын ашиглалтын хэсэгтэй хамтран 2012 онд нийт 41 га талбайд техникийн болон биологийн нөхөн сэргээлтийг Монгол улсад мөрдөгдөж байгаа нөхөн сэргээлтийн стандарт, олон улсын шилдэг туршлага дээр тулгуурлан хийж гүйцэтгэсэн байна. 2003 оноос хойш нийт 359,7 га талбайд техникийн болон биологийн нөхөн сэргээлт хийгээд байна. Бороогийнхон нөхөн сэргээлт хийсэн талбайнуудад байнгын ажиглалт хийж, арчилж тордох ажлыг мөн авч хэрэгжүүлдэг. Түүнчлэн орон нутгийн иргэдийн оролцоог нэмэгдүүлэх, мэдээллийг нээлттэй байлгах үүднээс Баянгол болон Мандал сумдын иргэдэд байгаль орчны сургалтууд зохион байгуулж нөхөн сэргээлтийн ажилдаа авч ажиллуулдаг байна.