Өмнөд Африкийн Ерөнхийлөгч асан Нельсон Мандела уушигны халдвар авсны улмаас цэргийн эмнэлэгт яаралтай хүргэгдэж, одоо эмчилгээ хийлгэж байна. Нас сүүдэр 94 гарсан экс Ерөнхийлөгч өмнө ч бас уушигны халдвар хэмээн эмнэлэгт хэвтэж байсан юм. Уушигны халдвар нь янз бүрийн нян, бактериас үүсдэг ханиад, агаарын замаар халдварладаг өвчин юм. Ялангуяа жирийн ханиад томууны вирусээс үүсээд бронхитоор дамжин халдварладаг аж.
Дархлаа нь суларсан, уушигны архаг өвчтэй настай хүмүүс энэ өвчнөөр өвчлөх магадлал өндөр байдаг байна. 27 жил шоронд хоригдсон Н.Мандела өмнө нь сүрьеэгээр өвчилж, анхан шатанд нь эмчлүүлж байсан болохоор иймэрхүү өвчинд мэдрэмтгий, тусахдаа амархан байдаг бололтой. Амьсгалын замд ноцтой хүндрэл учруулж бүр амь насанд ч аюул учруулж болзошгүй өвчин учраас Өмнөд Африкийн ард түмэн Н.Манделагийн төлөө санаа зовнин залбирч байна. Ард түмэндээ эцэг нь мэт хайрлагдсан түүний бие одоо илааршиж байгаа хэмээн Өмнөд Африкийн эрх баригчид түүнийг эргэж очсоныхоо дараа мэдэгджээ.
