Жолооны үнэмлэх есдүгээр сараас хойш сар бүрийн 1-нд хэвлэгдэнэ гэсээр өнөөдрийг хүрлээ. Хэвлэлийн компаниудын дунд нээлттэй тендер зарлаж “Смарт солюушн” ХХК-ийг сонгосон ч өнөөг хүртэл хэвлээгүй байна. Энэ талаар ЗЦГ-ын Олон нийттэй харилцах тасгийн дарга, цагдаагийн хошууч С.Энхбатаас тодрууллаа.
-Жолооны үнэмлэх хэзээ хэвлэгдэх вэ?
-Шүүх хурлаас шалтгаалаад өнөөдрийг хүртэл хэвлэж болохгүй явна. Жолооны үнэмлэх өмнө нь хэвлэж байсан “DMIT” компанийн гэрээг өнгөрсөн зургадугаар сарын 13-нд цуцалсан. Гэтэл тус компанийн удирдлагууд үндэслэлгүй зүйл хийлээ гэсэн шалтгаанаар Чингэлтэй дүүргийн шүүхэд гомдол гаргасан. Иймээс шүүхийн шийдвэрийг хүлээж байна.
-Шүүх хурал нь хэзээ болох ёстой юм бэ?
-Өнөөдөр /өчигдөр/ хуралдах ёстой байсан нь ч түр хугацаагаар дахиад л хойшилчихлоо. Шүүх хурал болсны дараа албан ёсоор мэдээлэл өгнө.
-Өнөөдрийг хүртэл хэвлэгдээгүй хэчнээн жолооны үнэмлэх байгаа бол?
-Одоо ч бүр овоорсон.
-Наймдугаар сараас хойш 10 гаруй мянган жолоочид түр үнэмлэх олгосон гэж байсан. Түр үнэмлэх олгож байгаа юу?
-Олгож байгаа. Гэхдээ удахгүй жолооны үнэмлэх хэвлэгдчих байх аа. Шинэ, хуучин хоёр компани урьдчилсан байдлаар ойлголцсон гэсэн. Тэгэхээр шүүх хурал ойрын хугацаанд болчихвол цаашдаа асуудал гарахгүй байх.
