Сүүлийн үед 2012 оны арванхоёрдугаар сарын 21-нд юу болох тухай дэлхий нийтээр элдэв цуурхал, таамаг тархаж газар авсаар байна. Зарим улсад мухар сүсэгт итгэгсэд хүнсний нөөц, хорогдох байраа хүртэл бэлдээд байгаа тухай мэдээллийн хэрэгслээр цацагдсаар байна. Энэ талаар эрдэмтэд хийгээд улс орны тэргүүнүүд ч ард иргэдэд хандан тайвшруулах үг хэлсээр байгаа юм. Тухайлбал, ОХУ-ын Засгийн газрын тэргүүн Дмитрий Медведев таван ч телевизэд өгсөн ярилцлагын үеэрээ ард иргэддээ хандан ертөнцийн төгсгөл болохгүй харин шинэ жил болно гэсэн байна. “Би ертөнцийн төгсгөл болох, тэгэх тэгэхдээ энэ жил болно гэдэгт итгэхгүй байна. Харин та бүхэнд сайн сайхныг авчрах шинэ оноо угтахад бэлтгэх хэрэгтэй байна” гэж Ерөнхий сайд хэлжээ.
Харин Монгол
Улсын Ерөнхийлөгч өнөөдөр twitter-ээр дамжуулан иргэддээ тайван байхыг
сануулав. Тэрээр twitter хуудсандаа бичихдээ “2012.12.21-нд юу болох
талаар их асуужээ. Онцгой юм юу ч болохгүй. Маргаашдаа, өөртөө, шинжлэх ухаанд
бас амьдралын туршлагадаа итгэ. Цуурхал хурдан тархдаг ч үнэн удаан үлддэг юм.
Харин 21-ний цуурхалыг далимдуулж аливаа хууль зөрчсөн үйлдэл хийхгүй байхыг
анхааруулъя” гэсэн байна. Мөн “Маргааш
буюу 2012.12.21 нд яах вэ?” гэсэн жиргээчийн
асуултад “Маргааш буюу 21-нд би ажил дээрээ, гэртээ, Улаанбаатарт байх
болно. Иргэд минь бүү санаа зов”
хэмээн хариулав.
Дашрамд сонирхуулахад ертөнцийн төгсгөл болно хэмээн цуурхал тараасан хэмээн Хятадад 93 хүнийг баривчилсан тухай “Интерфакс” агентлаг мэдээлсэн. Баривчлагдсан хүмүүсийн олонхи нь тус улсад хориотой “Бүхнийг чадагч бурхан” нийгэмлэгийн гишүүд гэнэ. Тэдгээр хүмүүсийг арванхоёрдугаар сарын 21-нд ертөнцийн төгсгөл болно, гурав хоног нар харанхуйлж, цахилгаан гэрэл ч асахгүй гэсэн хуудас тараасан хэрэгт буруутгажээ.