МАХН-ын дарга Н.Энхбаярт холбогдох хэргийг Улсын Дээд шүүх хянан хэлэлцээд анхан шатны шүүхээс оноосон дөрвөн жилийн ялыг 2,6 жил болгосон билээ. Гэвч МАХН-ын дарга Н.Энхбаяр үүнийг хүлээн зөвшөөрөхгүй гэдгээ мэдэгдэж байсан юм. Мөн биеийн байдал сайжраагүй байгаа гэдэг шалтгаанаар Клиникийн нэгдсэн II эмнэлэгт эмчлүүлж байсан юм. Тэгвэл өнөөдөр түүнийг ШШГЕГ-аас цагдан хорих анги руу авч явахаар Зайсан дахь Хорих 401 буюу хүүхдийн засан хүмүүжүүлэх газарт аваачив.
Биднийг тус газар очиход УИХ-ын дэд дарга Л.Цог, УИХ-ын Нийгмийн бодлого боловсрол, соёл, шинжлэх ухааны байнгын хорооны дарга З.Баянсэлэнгэ, Хууль зүйн дэд сайд Э.Эрдэнэжамъян, МАХН-ын Ерөнхий нарийн бичгийн дарга Г.Шийлэгдамба, Н.Энхбаярын эхнэр О.Цолмон нар ирсэн байлаа. Тэднийг тус ангид нэвтрүүлэхгүй гэсэн аж.
УИХ-ын гишүүн З.Баянсэлэнгэ, “Би Байнгын хорооны даргын хувьд Хүүхдийн хорих газар ажиллах бүрэн эрхтэй. Тиймээс би нэвтэрч ормоор байна” гэсэн ч тус хорих газрын хуягууд түүнийг оруулаагүй юм.
Энэ үеэр Н.Энхбаярын эхнэр Ц.Цолмонгоос тодруулга авлаа.
-Н.Энхбаярыг авч явах тухай өмнө нь мэдэгдэж байсан уу?
-Ерөөсөө мэдэгдээгүй. Ар гэрийнхэн болон өмгөөлөгчид нь мэдэгдэлгүй нөгөө л нэг хулгайч аргаараа аваад явсан байна. Буруу юм хийсэн гэдгээ л ойлгож байгаа юм байлгүй. Хуулийн дагуу байсан бол ингэж хулгай хийж авч явахгүй шүү дээ. Би очих гэсэн ч амжаагүй. Хар багтай “баатар”-ууд аваад явсан гэнэ. Дулаан хувцас ч өмсгөөгүй авч явсан гэж байна.
-Биеийн байдал ямар байгаа вэ?
-Муу байгаа. Өлсгөлөнгийн дараа биеийн жин ямар байлаа. Одоо бол түүнээс доош орсон. Яагаад гэхээр дөрөвдүгээр сарын 13-нд авч явсны дараа хэзээ хаана юм мэдэхгүй хүний биеийн эд эсийг үхүүлдэг хор уулгасан байгаа юм. Түүнээс болоод сэхэхгүй байгаа. Дархлаа нь ч гэсэн өлсгөлөнгийн дараагаас муу болсон. Бараг дархлаагүй хүн болсон. Ингэж хар хүйтэнд хувцас өмсгөхгүй авч явна гэдэг хатгалгаа тусна гэсэн үг шүү дээ. Бас л хүч хэрэглээд, бид бяртай гэж гайхуулж байгаа юм шиг авч явсан байна. Төр засагт хүч түрэмгийлэх бяр байна. Хүн чанар, хүнлэг сэтгэл огт алга. Манай гэр бүлийн байр суурь бол энэ хүнийг шоронд суулгаж байгаад алах л зорилготой авчирсан байх. Манай улс чинь алуурчнаар толгойлуулсан төртэй байна.
-Одоо та нар ямар алхам хийх вэ. Энхбаярт оноосон ялыг нь эдлүүлэхээр улайрч байгаа бололтой?
-Энэ торны цаана сууж байгаа нөхцөлд тэр хүнд ямар нэгэн эм тариа хэрэглэхийг би эсэргүүцнэ. Манай хүн ч эсэргүүцнэ. Эд нар хорлоно. Хэвлэлээр Энхбаярын сэтгэцэд өөрчлөлт оржээ гэсэн мэдээ гарсан. Энэ бол зохион байгуулалттайгаар цацсан байх. Торны цаана суулгаж байгаад ийм болгох гэсэн юм биш биз гэсэн хардлага надад байна. Манай хүн хоолонд бүрэн ороогүй. Тиймээс хоол хүнсээр нь хор өгч магадгүй. Өөрт нь тохирсон хоол байхгүй юм чинь манай хүн энд хоол идэхгүй. Хэзээ эрх чөлөөтэй газар очно тэр цагт л хоол иднэ.
-Тэгэхээр өлсгөлөн зарлана гэсэн үг үү?
-Одоо яая гэхэв. Эд нарын гарт хорлогдож байхаар өөрийнхөө мөрөөр л үхсэн нь дээр л дээ.
-Хар багтай хүн авч явсан гэхээр, ШШГЕГ-ынхан биш гэсэн үг үү?
-Биш ээ. Манай гэрийг түйвээдэг хүмүүс л байсан гэсэн.
-Авч явахад нь хамт хүн байгаагүй юм уу?
-Өмгөөлөгч нь хамт байсан гэсэн.