Н.ТҮВШИН

Энэ жил зах зээл дээр борлогдоогүй байгаа орон сууцны тоог 30 гаруй мянга байна хэмээн тооцоолж буй билээ. Ипотекийн зээлийн хүүг найман хувь болгож хугацааг 30 хүртэл жил болгоно хэмээн Засгийн газраас шийдвэрлээд хоёр жил гаруйн хугацаанд нийт 70 гаруй мянган өрх энэ зээлд хамрагдсан гэдгийг албаныхан хэлдэг. Тэгвэл өнөөдрийн зах зээл дээр байгаа орон сууцыг хэн худалдаж авах вэ. Иргэд орон сууцны үнийн дүнгийн 30 хувийг төлөөд зээлд хамрагдах боломж байгаа юу. Засгийн газраас энэ оны дундаас зээлийн урьдчилгаа 30 хувиа төлөх боломжтой иргэд нь орон сууцаа авчихсан учраас өнөөдөр энэ хувийг бууруулахгүй бол орон сууц борлогдох боломжгүй гэж үзсэн юм.

Зээлийн урьдчилгааг 10 хувь болгох санал дэвшүүлж, ажил хэрэг болох тун дөхсөн ч одоогоор хэрэгжүүлэх процедур дээрээ гацчихаад байгаа. Тиймээс www.assa.mn сайтаас орон сууцны зээлийн урьдчилгааг 10 хувь болгох нь иргэдэд үнэхээр хэрэгтэй байгаа юу гэдгийг сонирхон өнгөрсөн долоо хоногт зургаан өдрийн турш санал асуулга явууллаа. Энэ хугацаанд сайтад нийт 150 гаруй мянган иргэн хандсан ч тэдний 30-аад хувь нь судалгаанд оролцжээ.  Судалгаанд оролцсон иргэдийн 74,6 хувь нь зээлийн урьдчилгааг 10 хувь болгох нь зүйтэй гэж үзсэн бол 18 хувь нь 30 хувь хэвээр хадгалах нь зөв гэжээ. Харин 2,8 хувь нь зээлийн урьдчилгаа 20 хувь байх ёстой гэж үзсэн бол 4,4 хувь нь надад хамаагүй гэж хариулсан байна.