Германд тэртээ 1990-ээд онд өрнөсөн ардчилсан өөрчлөлтийн үеэр Берлин хотод байсныг нь буулган хотоос гаргаж газар булсан Лениний хөшөөг эрэн хайж олон хэсгүүдийг нь цуглуулж эхэлсэн байна. Тухайн үедээ Берлин хотын гол чимэг болж байсан таван давхар байшинтай чацуу, гантиг чулуун  хөшөөг зөвлөлтийн, коммунизмын бэлгэдэл хэмээн зайлуулсан ч өнөөдөр түүхийн гэрч, урлагийн бүтээл гэдэг утгаар нь ийн олж эргүүлэн авч байна. Одоогоор ганцхан толгойг нь олсон нь л гэхэд 3,5 тонн жинтэй гэнэ. Толгойг элс шорооноос цэвэрлэж Цидатель Шпантаугийн музейд шилжүүлэх юм байна.

“Хотоос авч зайлуулсан энэ хөшөөг одоо хүмүүст үзүүлэх хэрэгтэй, энэ чинь орчин үеийн түүх. Хөшөө, баримлыг хадгалж, хойч үедээ үзүүлж байх хэрэгтэй. Энэ бүхэн чинь түүхэн үйл явдлын гэрч” гэж нутгийн нэгэн иргэн хэлжээ.
Хөшөөг хаана булсныг эхлээд эрэн хайж, сурагласаар байгаад элсний карьерт аваачиж булсныг олж тогтоожээ. “Зөвлөлтийн үеийг мартахгүйн тулд энэ толгойг хүмүүст үзүүлж өнгөрсөн үеийг сануулж байх ёстой” гэж Германы Байгаль орчныг хамгаалах холбооны төлөөлөгч Херберт Лонер хэлж байна.

19 метр өндөртэй энэ хөшөөг  1970 онд Берлинд нээж 21 жилийн дараа 129 хэсэг болгон хээр хаясан нь “Гуд бай, Ленин” гэдэг баримтат кинонд түүх болон үлджээ.
“Хүмүүс тэр коммунизмын тухай байнга санаж байх ёстой. Энэ түүх манай улсын баруун зүүнд өөр өөр  л дөө. Гэхдээ би Ленинийг баруун хэсэгт бэлгэ тэмдгийн байдлаар үзүүлэх нь нэг их ач холбогдолгүй байх гэж бодож байна. Берлин өнөөдөр нээлттэй хот болохоор Лениний энэ толгойг хүмүүс сонирхоно” гэж түүхч Йохен Белер ярьж байна.
Лениний хоёр метр хэртэй том толгой одоо берлиний энэ музейд кайзерын болон веймарын герман, нацизмын үе, социализмын үеийн үзмэрүүдтэй хамт байрлах болж байна.