Засгийн газрын иргэдийн санал хүсэлт хүлээн авах “11-11төв” өнгөрсөн долоо хоногт иргэдээс 934 санал хүсэлт, талархал, гомдол, шүүмжлэл хүлээн авчээ. Тэдний дунд хөгжлийн бэрхшээлтэй иргэдийн халамж, тэтгэврийн нэмэгдэл, “Эхийн алдар” нэг, хоёрдугаар зэргийн одонгийн мөнгө хэзээ олгохыг тодруулсан нь цөөнгүй байв. Уг асуултад Нийгмийн халамж үйлчилгээний ерөнхий газар “Нийгмийн халамжийн тэтгэвэр МУЗГ-ын 2014 оны 16 дугаар тогтоолоор энэ сарын 1-ний өдрөөс эхлэн 115 мянган төгрөг болж нэмэгдсэн. Мөн Нийгмийн халамжийн асаргааны тэт­гэм­жийг 52.8 мянган төг­рөг болгож нэмэгдүүлэн тог­тоо­сон. Эхийн алдар нэг, хоёрдугаар зэргийн одонтой эхэд олгох мөнгөн тусламжийг энэ сарын 25-ны өдрөөс олгож эхэлнэ” гэсэн хариулт өгчээ. Мөн амины орон сууц худалдан авах болон орон сууц барьсан иргэдийг жилд найман хувийн хүүтэй орон сууцны зээлд хамруулах, зээлд хамрагдаж буй байрны талбайн хэмжээг нэмэх талаар санал ирүүлжээ. Засгийн газрын 2013 оны 200 дугаар тогтоолоор батлагдсан “Орон сууцны ипотекийн зээлийн ерөнхий журам”-д амины орон сууц худалдан авах иргэдийг хамруулах, инженерийн дэд бүтцэд холбогдсон өөрийн өмчлөлийн газарт амины орон сууц барихаар төлөвлөж байгаа айл өрхүүдийг зээлд хамруулах чиглэлээр судалгаа хийж буйг Барилга, хот байгуулалтын яамнаас хариулжээ. Мөн найман хувийн хүүтэй зээлд хамрагдаж буй орон сууцны талбайн хэмжээг нэмэхээр ярилцаж байгаа гэнэ.