Оросын “Алёнка” шоколадыг мэдэхгүй хүн үгүй биз ээ. Орос алчуур зангидсан том цэнхэр нүдтэй бяцхан охины зурагтай энэ шоколадыг хүн бүр амтархан  иддэг ч энэ зургийн эзний тухай бодож эргэцүүлсэн нь хэд билээ.

Оросын чихэр амттаны том үйлдвэр “Улаан Октябрь” завод шинэ бүтээгдхүүнийхээ баглааг чимэх сонгодог зураг авахаар 1964 онд  “Оройн Москва” сонинд уралдаан зарлаж.
Зураач Александр Михайлович Геренис үүнд найман сартай охиныхоо зургийг санал болгож эхнэрийнхээ авсан гэрэл зургийг илгээсэн нь түрүүлснээр түүх эхэлж.

Гэрэл зургийг үйлдвэрийн зураач Н.Маслов уран зураг болгон шоколадын баглаан дээр буулгаснаар энэ охин  зөвхөн орос орон төдийгүй энэ үйлдвэрийн бүтээгдхүүнийг авдаг улс орнуудад алдаршиж .
             
Харин Геринасын гэр бүл, охин өөрийнхөө дүр, зургийг ашиглуулсны төлөө ямар ч шагнал урамшуулал аваагүй гэдэг.

2000 оны хоёрдугаар сард Елена Геринас хатагтай зохиогчийн эрхийн төлөө шүүхэд хандсан ч хоёр жил хэртэй үргэлжилсэн заргын эцэст үүнийг хэрэгсэхгүй болгоод өнгөрсөн гэдэг. Гэхдээ шүүх  энэ бол Елена биш зүгээр оросы охины нийтлэг дүр, тэгээд ч “Алёнка”-гийн нүд цэнхэр байхад Еленагийн нүд хүрэн байна гэж үзжээ.

Мөн “Улаан Октябрь” заводынхан энэ зургийг зурсан зураач нь 40 жилийн өмнө бүтээлийнхээ шагналыг авсан, зохиогчийн эрх нь түүний нэр дээр байгаа, түүнийг хэн ч ашиглах эрхгүй  гэж мэлзжээ.
Юутай ч энэ зураг үйлдвэрийн энэ бүтээгдхүүний борлуулалтад үнэлж баршгүй их хувь нэмэр оруулсан нь үнэн.