Хятадын археологчид мөнгөн дотортой алтан хайрцганд хийж, жижигхэн суварганд нууцалсан гавлын ясны хэсэг олсноо Буддагийнх байх гэж таамаглаж байна хэмээн “Live Science” хэвлэл мэдээллээ. Мянга орчим жилийн настай, 117 см өндөр, 45 см өргөн  энэ суваргыг  Нанжин хотын нэгэн сүмийн тууринд чулуун авдранд нуусан байжээ. Алтан хайрцганд гавлын яснаас гадна гурван ширхэг болор сав, шашны эд зүйл бүхий мөнгөн хайрцаг байсан байна.
Суваргыг ч бас зандан мод, алт мөнгөөр урлан, эрдэнийн чулуунуудаар чимэглэсэн байж. Эрдэмтэд суварга дээрх сийлбэрийг судалж үзээд эл суваргыг манай эриний 997-1022 оны үед тогтнож байсан Сун гүрний эзэн хаан Жэнь-Зуны үед бүтээсэн гэж үзэж байна.

Суварга дээр бас үүнийг бүтээхэд хандив өргөгсдийн нэрсийг сийлсэн байжээ.
Чулуун авдарт Буддагийн ясыг Хятадад хэрхэн авчирсан тухнай түүхийг бичиж хадгалсан байна. Энд өгүүлснээр бол Буддаг нирваан дүр олсны дараа цогцосыг нь Хираннавати голын дэргэд түүдэг дээр шатаагаад Энэтхэгийн Ашок хаан шатсан ясны үлдэгдлийг 84 хэсэг болгон хувааж 19-ийг нь Хятад руу илгээсэн гэнэ.
Үүний нэг болох энэ ясыг Нанжины нэгэн сүмд хадгалж байсан ч 1400 жилийн дараа дайны үеэр энэ сүм нь нурж сүйдсэн юм байна. Эзэн хаан Жэнь-Зун  сүмийг сэргээн босгохыг хориглосон учраас лам нар ясыг ухаж гаргаад 1011 оны долдугаар сарын 21-ний өдөр их ёслол үйлдэн яс, бусад эд өлгийн зүйлсийг дахин нууцалж хадгалжээ.
2015 онд нидерландын эрдэмтэд XI-XII  зууны үеэд бүтээсэн Будад бурхны баримал дотроос нэгэн ламын занданшсан шарил олж илрүүлсэн юм. Будда судлаач Эрик Брейн үүнийг шашны сургуулийн гол төлөөлөгч Люцюанийн бүтээл гэж үзэж байгаа юм.
Будда Шагжмуни ойролцоогоор манай эриний өмнөх 560-478 оны үед амьдарч байсан түүхэн хүн. Сиддхартха Гаутама нэртэй тэрээр Шагжа омгийн улсын нийслэл Капилавасту балгаст Суддодана Гаутама хааны  гэрт төрж, тансаг орчинд өссөн ч 29 насандаа ордноо орхин хүмүүний зовлон жаргалыг хуваалцахаар шийдсэн гэдэг.