Хятадын зүүн хойд нутгийн том хотууд смог буюу өндөр нягтралтай утаан мананд автаад байна. Смог нь үйлдвэр, цахилгаан станц, машин, орон сууцны зуухны утаанаас тогтсон байдаг тул хортой бодисын агуулга маш өндөр. Тяньжин хотын удирдлагууд смогтой холбоотойгоор хотын олон нийтэд учирч болзошгүй аюулын түвшнийг “улбар шар” буюу хамгийн аюултай өмнөх хэмжээнд байна гэж зарлалаа. Иймд хотын оршин суугчдыг онц шаардлагагүй бол гэрээсээ гарахгүй байхыг анхааруулж, тус хотод үйл ажиллагаа явуулдаг бүх үйлдвэр, барилгын ажлыг зогсоосон байна.

Аравдугаар сарын 3-аас эхлэн салхигүй, бүгчим цаг агаартай байсны улмаас утаа хотоос зайлуулагдахгүй хуримтлагдаж эхэлснээр аюултай нөхцөл бүрдсэн байна. Улмаар хотын агаарын цэвэр байдлын индекс 173 нэгж хүрчээ. Энэхүү индекс нь 0-50 байвал агаар хэвийн гэж үздэг бол 201-300 хүрэхэд хөгшид хүүхэд гэлтгүй нийт хүн амд хортойгоор нөлөөлнө гэж үздэг.
Аравдугаар сарын 5-нд Тянжин болон бусад хотыг агаарын хүйтэн урсгал нөмрөх бөгөөд үүний нөлөөгөөр агаарын бохирдлын хэмжээ багасна гэж төлөвлөж байгаа аж.