Боловсролын бодлогыг шинэчлэх ажилд Багш нарын холбоо Боловсрол шинжлэх ухааны яамтай хамтран ажиллахаар болж, дэд сайд Б.Ундармаа, Монголын Багш нарын Холбооны ерөнхийлөгч Б.Жадамба нар хамтран ажиллах санамж бичигт гарын үсэг зурлаа. Монголын Багш нарын Холбоо боловсролын бодлогыг шинэчлэх ажилд яаж оролцох талаар ерөнхийлөгч Б.Жадамбаас тодруулахад “Боловсролын бодлогыг шинэчлэх ажлыг бид шат дараатайгаар гурван хэсэг болгон хийнэ. Нэгдүгээрт, ахмад үеийн багш нарын сургалтын арга зүйг өнөөгийн сургалтад ашиглаж, түгээн дэлгэрүүлэх. Хоёрдугаарт, хүүхэд бүрийг хөгжүүлэх хөтөлбөрт багш болгон өөрийн хүч бололцоогоо дайчлан, баг бүрдүүлж төсөл хэрэгжүүлэх юм. Гуравт, шинэчлэлийн үр дүнг багш нар үнэлж цэгнэн БШУЯ-нд бодит байдлыг мэдээлэхийн зэрэгцээ залуу багш нараа хөгжүүлнэ” гэсэн юм. Дээрх хөтөлбөрт оролцож буй “Монгени” цогцолбор сургуулийн захирал Н.Лхагва хэлэхдээ “БШУЯ-аас боловсролын төрийн бодлого хүүхэд бүрт хүрч байж чанарын шинэчлэл хийгдэнэ, боловсролын үйлчилгээ хүмүүнлэг болно гэж тодорхойлсон. Бодлогын дагуу манай сургууль БШУЯ-ны загвар сургууль болсон. Цаашид хөдөө орон нутгийн багш нар манай сургууль дээр ирж туршлага солилцох болно” гэсэн юм.