Монгол Улсын их сургууль дүнгийн мэдээллээ цахим системд шилжүүлээд хоёр жил болж буй. Ингэснээр оюутан бүр дараагийн семистерт судлах хичээлээ SISI хэмээх программыг ашиглан баталгаажуулдаг болсноор багш, оюутны ажлыг хөнгөвчилсөн юм.
Гэвч энэ жилээс хичээлийн баталгаажуулалтаа хийхийн тулд заавал төлбөрөө төлсөн байх хэрэгтэй гэсэн шаардлага сургуулийн захиргаанаас гаргажээ. Энэ талаар МУИС-ийн Нийгмийн шинжлэх ухааны сургуулийн сургалтын албаны дарга Б.Болд-Эрдэнээс тодрууллаа.

Б.Болд-Эрдэнэ: Оюутнууд сургалтын төлбөрөө шинэ дансанд тушаана

-МУИС дүнгийн мэдээлэл оруулдаг цахим мэдээллийн хуудсаа ашиглан сургалтын төлбөрөө урьдчилан авах гэж байна гэх юм. Энэ талаар та тайлбар өгөхгүй юү?
-Энэ жилээс сургалтын хөтөлбөрт өөрчлөлт орсон. Кредитийн мөнгө болон суурь хураамжаа төлсөн тохиолдолд оюутан хичээлдээ суух эрх нь нээгдэнэ.
-Хичээл баталгаажуулах хугацаа нь хэзээ дуусах вэ?
-Энэ сарын 21-нд хичээл баталгаажуулах хугацаа эхэлсэн бөгөөд хичээл ортол үргэлжлэх юм.  Энэ хугацаанд “Голомт банк”-ны дансанд сургалтын төлбөрөө шилжүүлэх ёстой.
-Өмнө нь “Хаан банк”-ны дансаар төлбөрөө авдаг байсан шүү дээ?
-Манай сургалтын “SISI” программ нь төлбөрөө зөвхөн “Голомт банк”-ны дансанд хийсэн тохиолдолд хүчинтэй болдог юм билээ. Тиймээс шинэ данс өгөхийг л хүлээх хэрэгтэй дээ.
-Төлбөр тушаах шинэ данс хэзээнээс оюутнуудад тодорхой болох вэ?
-Сайн мэдэхгүй байна. Ямар ч байсан энэ долоо хоногт багтаад янзална гэж надад мэдэгдсэн.
-Нэгдүгээр курст орж байгаа хүүхдүүд төлбөрөө яаж тушаах вэ?
-Шинээр элсч буй хүүхдүүд манай сургуулийн ашиглаж байсан “Хаан банк”-ны дансанд төлбөрөө тушаахаас өөр арга байхгүй. Тэдний асуудлыг дараа нь шийдэх байх.