Нойр хүний ой ухааныг сайжруулахад хамгийн тустай зүйл гэдэг. Ялангуяа өдрийн цагаар түр дугхийх нь ажилтай хүмүүсийн хувьд эрч хүч өгч, хүүхдүүдийн хувьд сурлагаа сайжруулж, ой тогтоолтоо нэмэгдүүлэхэд нь тус болдгийг судалгаагаар тогтоосон байдаг. Тэгвэл үүнийг дахин баталсан судалгааг Массачусеттсийн их сургуулийн эрдэмтэд саяхан хийсэн. Судлаачид бага насны 40 хүүхдийг судалгаандаа хамруулж, өдөр бүр хоолны дараа тогтмол нэг цаг унтуулж байжээ. Ингэхэд тэдний үдээс хойшхи хичээл болон маргааш өглөөний хичээлдээ оролцох идэвх оролцоо болоод ой тогтоолт бусад хүүхдээс хамаагүй илүү байжээ. Цэцэрлэгт хүүхдүүдийг өдрийн цагаар унтуулдаг нь тэднийг багшаас сурсан зүйлээ хурдан тогтоож, цовоо сэргэлэн байхад нь их тустай байдаг бол сургуульд ороод ирэхээр хичээлдээ яваад өдөр унтах боломжгүй болгодог. Тиймээс бага насны хүүхдүүдээ идэвхтэй, сурлага сайтай болгоё гэвэл өдөр унтуулж байх нь зүйтэй гэж судлаачид зөвлөж байна.