Монгол Улсын хүний эрхийн үндэсний комисс, Иргэний нийгмийн байгууллагуудын долоо дахь удаагийн уулзалт боллоо.
Уулзалтын үеэр хүний эрхийг хамгаалахын төлөө ажилладаг ТББ-аас ирүүлсэн төсөл хөтөлбөрүүдээс 2014 онд тэтгэлэгт хамрагдах  боломжтойг нь танилцуулсан юм. Энэ тэтгэлэгт хамрагдсан “Өөрчлөлтийн төлөөх залуу эмэгтэйчүүд” ТББ-ийн Ерөнхий зохицуулагч Б.Золзаяатай ярилцлаа.

-ХЭҮК-оос  ирэх онд хэрэгжүүлэх тэтгэлэгт хөтөлбөрт танай бай­гуул­лагын “Бэлгийн да­­­­рамтгүй сургууль тө­­сөл”-ийг оруул­жээ. Сур­гуулиудад бэлгийн дарамт байгааг судалж тогтоосон юм уу?
-Бид өмнө нь сургуулиудад судалгаа хийж байсан. Ер нь, их сургуулиудад бэлгийн дарамтын хохирогч болж байгаа нь залуу эмэг­тэйчүүд байдаг. Гэхдээ их дээд сургуулийн багш нар оюутнууддаа бэлгийн дарамт байнга үзүүлдэг гэж ойлгож болохгүй юм. Цөөн тооны ёс зүйгүй дадал зуршилтай багш нараас болдог. Гэтэл ямар ч хариуцлагын тогтолцоо байхгүй учраас хүлээн зөвшөөрөгдсөн, дархлагдсан ойлголт болсон байна. Үүнийг өөрчлөх ёстой. Багш хүний ёс зүй, болон эрхзүйн хувьд бэлгийн дарамт үзүүлэх ёсгүй. Уг төслийг  хэрэгжүүлэхдээ бид энэ сургууль ийм тийм гэхээс илүүтэйгээр  урьдчилан сэргийлсэн  ажил хийнэ.  Энэ нь тухайн сургуулийн нэр хүнд, байр суурийг илэрхийлэхээс гадна, хүний эрхийг дээдэлсэн орчин цагийн шаардлагад нийцсэн зүйл болно гэж үзэж байна. Гадаадын сургуулиу­дын жишгээс харсан ч сургалтын чанар сайн байхаас гадна, сургалтын орчин нөхцөл суралцаж байгаа хүмүүстээ аюулгүй ээлтэй гэдэг шалгуурууд тавьдаг. Ямар ч сайн сургалттай байлаа гээд оюутнуудад дарамт үзүүл­сэн бол сайн сургуулийн шаардлага хангахгүй юм. Аюулгүй, дарамтгүй суралцах орчин нөхцөл бүрдүүлнэ гэдэг нь тухайн сургуулийн нэр хүнд байх учиртай.
-Төсөлд хамрагдаж чадсан нь ирэх онд зайлшгүй хийх шаард­лагатай чухал асуудлын нэг  учраас тэр байх. Энэ асуудалд хэрхэн хандаж төслийн хүрээнд ямар ажил хийх вэ?
-Өмнө нь сургуулиудад бэлгийн дарамт байгаа эсэх талаар судалгаа, хэлэлцүүлэг хийж байсан ч түүнээс хамгаалах сис­­тем тогтолцоо бүр­дүү­лээгүй. Өөрөөр хэл­бэл, яг ийм дүрэмд ингэж захирагдаж алдаа дутагдал гаргавал тэгж хариуцлага хүлээлгэнэ гэсэн тогтолцоо бий бо­­лоогүй юм. Харин энэ төслийн хүрээнд хариуц­­лагын тогтолцоог бүрдүүлэх учиртай. Эхний ээлжинд яригдаад байгаа энэ асуудал маань хэр бодитой, ямар хэмжээнд байгаа ,ямар хэлбэрээр өртөж байна гэдэг дээр судалгаа явуулахаар тө­лөвлөөд  байна. Дараа нь судалгаандаа үндэслэж сургуулиудтай хамтарч дүрэм журмаа батлуулах юм. Олон улсын жишигт  бэлгийн дарамт гэж яг ямар ойлголт вэ гэд­гийг энгийнээр тайл­барласан дүрэм журамтай байдаг.  Гэтэл манайд хэтэрхий ерөнхий бай­гаа.  Цаашлаад бэл­гийн дарамтанд өртсөн то­хиолдолд хаана хэнд хандах ёстой вэ гэх мэт асуудлуудыг шийд­вэрлэнэ.
-Тэгэхээр судалгаа­ны ажил хэзээнээс  аль сургууль дээр эхлэх вэ ?
-Оюутнуудын амрал­тын үе одоо эхэлж байна. Хоёрдугаар улир­лын хичээл эхлэхэд судалгаа хийнэ. Үүнээс  өмнө судалгаагаа болон санал болгох загвараа боловсруулах гээд бэлтгэл ажил их бий. Мөн оюутнуудтай хамтарч ажиллаж сургалтанд хам­руулна. Судалгаа явуу­лах сургуулиар МУИС, ЭМШИУС-ийг сонгоод байна. Гэхдээ  энэ асуудалд хамгийн их өртдөг гэж сонгоогүй. Товчхондоо одоогоор харил­цаа тогтоосон сур­гуулиуд юм. Мөн эдгээр сургууль бусаддаа жишиг болно гэж үзэж байгаа.
-Судалгаанд хич­нээн багш, оюутан хамруулах вэ?
-Бидний төлөвлөснөөр 600 оюутан судалгаанд хамруулахаар болсон. Эндээс судалгаа гаргахад боломжийн тоо гэж үзэж байгаа. Судалгааг зөвхөн асуулгаар ч юм уу бөглүүлэх зарчмаар авахгүй ярилцлага хэл­бэрээр авна. Ингэснээр судалгаагаа баримтжуулж авах боломжтой гэхдээ су­­дал­гаанд оролцсон багш,    оюутны нэрийг нууц­­лана.
-Төслөөс ямар дүн хүлээж байна вэ?
-Бидний зорьж байгаагаар дээр дурьдсан хоёр сургуульд бэлгийн дарамтгүй сургуулийн дүрэм батлагдана гэж харж байгаа. Хэрвээ эдгээр сургууль дээр батлагдаж чадвал бусад сургуульд батлагдах боломж бий болох юм. Цаашлаад Боловсролын яамаар дамжуулаад бүх их дээд сургууль болон ЕБС батлуулах боломжтой. Ер нь боловсролын тогтолцоо өөрөө ямар нэгэн дарамтгүй  байх ёстой юм.