Нийслэлийн Засаг даргын 2013-2016 оны үйл ажиллагааны хөтөлбөр, нийслэлийн  2013 оны эдийн засаг, нийгмийн зорилтод туссаны дагуу хүүхдийн эрүүл аюулгүй орчинг бүрдүүлэх, сургуулийн болон сургуулийн өмнөх насны боловсролын байгууллагын хүрэлцээ хангамжийг нэмэгдүүлэх зорилгоор НИТХ-ын 2013 оны А/35 дугаар тогтоолоор Улаанбаатар хотод 83 бага сургуулийн газрын байршлыг тогтоож, цэцэрлэг-бага сургуулийн цогцолбор хэлбэрээр барихаар шийдвэрлэжээ. Эдгээрээс энэ онд БЗД-ийн 19, 22, 23, 27 дугаар хороо,  СХД-ийн  11, 24 дүгээр хороо,  тус дүүргийн 170 дугаар цэцэрлэгийн хашаанд, СБД-ийн 17,  9 дүгээр хороо,  ХУД-ийн 10, 14, 15  дугаар хороо, БГД-ийн 22 дугаар хороо, ЧД-ийн 12, 16, 17-р  дугаар хороонд бага сургууль-цэцэрлэгийн цогцолборыг нийслэлийн төсвийн хөрөнгөөр барихаар болсон байна. Цогцолборын барилга нь нэг загвартай байх бөгөөд 120 хүүхдийн цэцэрлэг, 180 сурагчтай бага сургууль барихаар зураг төслийг нь боловсруулжээ. Эдгээр цогцолбор ашиглалтад орсноор боловсролын үйлчилгээ иргэд, сурагчдад ойртож, гэрээсээ  500 метрийн радиус дотор  хүүхдүүд сурч хүмүүжих боломжтой болох юм. Төлөвлөж байгаагаар бага сургууль-цэцэрлэгийн цогцолбор барилга нь хоёр хаалгатай, урд талаар гол орцтой,  хойд талаараа ажилчдын болон онцгой байдлын орцтой байх аж. Мөн хүүхдийн амрах, хичээллэх бүх өрөө нар үзэх боломжтой төдийгүй сургалт хүмүүжлийн барилгын норм дүрэм баримтлан зураг төслийг нь боловсруулжээ.