Гэр бүлийн хүчирхий­лэл­тэй тэмцэх тухай хуу­лийн шинэчилсэн най­руул­гын төслийг өчигдөр Хуульзүйн байнгын хорооны хуралдаанаар авч хэлэлцлээ. 2004 онд Гэр бүлийн хүчирхийлэлтэй тэмцэх тухай хууль баталснаас хойш буюу 10 жилийн дараа шинэчлэн найруулжээ. Энэ хугацаанд хүчирхийлэлд өртсөн хо­хи­рогчдыг хамгаалан байр­луулах, гэр бүлд утсаар зөвлөгөө өгөх үйлчилгээг мэргэшсэн төрийн бус байгууллагаар гүйцэтгүүлж. Мөн нэг цэгийн үйлчилгээний төвүүд байгуулан үйлчилгээ үзүүлж эхэлсэн зэрэг бодлого, үйл ажиллагааны хүрээнд нааштай алхмууд болсон байна. Гэсэн хэдий ч сүүлийн жилүүдэд гэр бүлийн хүчирхийлэл буурахгүй, хүний амь нас хохирох, гэмтэх, хүүхэд өртөж эхлэснээр барахгүй илүү ноцтой хэлбэрт шилжээд байгаа юм. Сүүлийн гурван жил найман сарын хугацаанд гэр бүлийн хүчирхийллийн гэмт хэрэг 1505 бүртгэгдсэнээс 49 хүн амь насаа алдаж, 1180 хүн гэмтжээ.

Цагдаагийн байгууллагад бүрт­гэгдээгүй болон захир­гааны зөрчилд тооцож арга хэмжээ авахуулсан хүчирхийллийн тоо үүнээс даруй тав дахин их бий гэнэ. Үүнийг ТББ-уудын хийсэн судалгаа харуулж буй. Хууль хэрэгжиж эхлээд найман жил өнгөрөхөд хохирогчийн аюулгүй байдлыг хамгаалах 41 шийдвэрийг шүүх гаргасан ч нэг нь ч хэрэгжээгүй байна. Энэ нь хуулийн зохицуулалт оновчтой бус, ялангуяа байгууллагуудын эрх хэмжээ, оролцоог хэт ерөнхий, салангид байдлаар тусгаж, хохирогч, түүний гэр бүлийн гишүүдийн аюулгүй байдлыг хамгаалах чиглэл орхигдуулсантай холбоотой аж.

Хуулийн төслийг шинэчлэн найруулахдаа үйлчлэх хүрээг өр­гөтгөж, хохирогчдыг хам­гаа­лах боломж бүр­дүүлжээ. Нас, сэтгэхүйн онц­лог, эцэг эх, хууль ёсны асран хамгаалагчаас хамааралтай эмзэг байдлыг харгалзан хүүхдийг гэр бүлийн хү­чирхийллээс хамгаалахыг нэг бүлэг болгон шинээр оруулсан гэлээ.
Гэр бүлийн хүчирхийлэлтэй тэмцэх, урьдчилан сэргийлэх, хохирогчийг хамгаалах бай­гууллагуудын үйл ажил­лагааны уялдаа холбоо, салбар дундын зохицуулалт, тэргүүлэн гүйцэтгэгчийг то­дорхой болгожээ. Энэ төрлийн хүчирхийллийг зөрчил хэмээн үзэж, гэм буруутай этгээдэд хариуцлага хүлээлгэх асуудлыг хохирогчийн үүрэг болгож, эрсдэлд оруулахаас гадна дахин давтагдахад хүргэж буйг өөрчилж, гэмт хэрэгт тооцож, заавал  хариуцлага хүлээлгэхийг мөн төсөлд тусгажээ.

Нийслэлийн цагдаагийн газрын дэргэд байрлах түр хамгаалах байр гуравдугаар сараас хойш 32 иргэнд үйлчилсэн гэнэ. 1222 дугаартай шуурхай утас ажиллуулан иргэдээс мэдээлэл авахаас гадна 102 утсаар ирсэн хүчирхийллийн шинжтэй гэмт хэргийн дуудлагын дагуу хохирогчдыг тусгай газар байршуулж, сэтгэлзүйн болон нийгмийн үйлчилгээ үзүүлжээ. Хүчирхийллийн эсрэг үндэсний төвийн дэргэдэх хохирогчдод үйлчилгээ үзүүлдэг төвөөс гадна Дорнод, Дундговь, Орхон аймагт мөн байгуулсан байна. Эмнэлэгт суурилсан нэг цэгийн үйлчилгээ Гэмтлийн эмнэлгээс гадна, хоёр дүүргийн эмнэлэгт байгуулан хохирогчийг 1-3 хоног байрлан эмнэлгийн үйлчилгээ үзүүлэх гадна мөрдөн байцаагчтайгаа уулзан асуудлаа ярилцах боломжоор хангажээ.
УИХ-ын гишүүд хүүхдийг гэр бүлийн хүчирхийллээс хамгаалах зохицуулалтыг нухацтай ярилцах нь зүйтэй гээд монгол уламжлал арга ухаантай хослуулан тусгах ёстойг анхааруулсан юм. АНУ, Европын уламжлал, соёлоос тэс өөр монгол уламжлалаар хүүхдээ хүмүүжүүлдгийг харгалзан үзэхийг санал байдлаар хөндөв. Ингээд хуралдаанд оролцсон гишүүдийн олонхи нь энэ хуулийн төслийг хэлэлцэхийг дэмжлээ. Уг асуудлыг С.Баярцогт гишүүнээр ахлуулсан ажлын хэсэг байгуулан, нягталж, судлахаар шийдвэрлэв.