Их дээд сургуульд элсэх визээ авахаар элсэгчид шалгалтаа өгч байна. ЭЕШ-ын журамд өөрчлөлт орсны дагуу энэ жилээс шалгалт өгөхөөр бүртгүүлэгчид монгол хэл бичгийн шалгалтыг нийтээрээ өгөхөөр болсон. Хамгийн эхний шалгалт болох монгол хэл бичгийн шалгалт өнгөрсөн бямба гарагт 12:00 цагт орон даяар зэрэг эхэлсэн. 100 минутын хугацаанд үргэлжилсэн энэ шалгалтыг ЭЕШ өгөхөөр бүртгүүлсэн бүх элсэгч өгөх ёстой байсан. Гэсэн хэдий ч нийт бүртгүүлсэн 41 мянга орчим төгсөгчийн мянга гаруй нь тус шалгалтыг өгөөгүй байна.  
Энэ талаар Боловсролын үнэлгээний төвийн Элсэлтийн болон улсын шалгалт хариуцсан хэлтсийн дарга Л.Ганбатаас тодруулахад “Монгол хэл, бичгийн шалгалтыг бүх бүртгүүлэгч өгөх ёстой байсан ч мянга орчим хүүхэд шалгалтаа өгсөнгүй. Дийлэнх нь нийслэлд шалгалтаа өгөхөөр бүртгүүлсэн байсан. Журмаараа бол энэ шалгалтыг өгөөгүй хүүхэд бусад шалгалтаа өгөх боломжгүй. Гэхдээ комиссоор энэ асуудлыг авч хэлэлцээд анхны жил, тэгээд ч энэ удаагийн монгол хэл, бичгийн шалгалт туршилт болж байгаа учраас тэдгээр бүртгүүлэгчийг бусад шалгалтад нь оруулахаар боллоо” гэв.