Монгол-Японы стратегийн түншлэлийн хугацаат хөтөлбөрт тусгагдсан “Инженер, технологийн дээд боловсрол” төслийн хүрээнд 200 оюутныг Япон улсын Коосэн сургуульд хамруулан сургахаар болсон.

Энэ нь “Инженер 1000” төслийн хүрээнд хийгдэж буй ажил бөгөөд есөн жилийн хугцаанд үргэлжлэх юм. Тодруулбал, инженерийн чиглэлээр суралцдаг 1000 оюутныг ирэх есөн жилд Японы Коосэн сургуульд хэсэг хэсгээр нь сургах бөгөөд хоёр орны Засгийн газрын зээлээр 0.2 хувийн хүүтэйгээр хамруулж байгаа юм. Төсөлд хамрагдан сурч төгсч ирсэн оюутнууд эх орондоо, мэргэжлээрээ тав хүртэлх жил үр бүтээлтэй ажиллавал сургалтын зардлыг нь тэтгэлэг болгон чөлөөлөх ажээ.
Өчигдөр БШУ-ны сайд Л.Гантөмөр болон Японы талын зочид төлөөлөгчид тус төслийг албан ёсоор нээж, бэлтгэл сургалтын хөтөлбөр буюу 1.5 жил япон хэлний бэлтгэл сургалтад хамрагдаж буй 47 оюутны хичээлийн байр, суралцах орчин зэрэгтэй танилцсан юм. Нээлтийн ажиллагааны үеэр БШУ-ны сайд Л.Гантөмөр хэлсэн үгэндээ “Үйлдвэрлэгч улс болж сайн эдийн засагтай орон болохын тулд чадварлаг инженер бэлтгэх хээрэгтэй. Сайн инженерүүд улсынхаа хөгжлийг тодорхойлж, технологийг шинэчлэл хийдэг байх ёстой. Өнөөдөр Коосэн сургалтын анхны элсэлтийг хүлээн авлаа. Энд эх орны ирээдүйг бүтээх сайн инженерүүд элсэн орсон гэдэгт итгэлтэй байна” хэмээсэн юм.