Улс орон даяар бүх шатны сургуулиудын хичээлийн жил дуусахад ердөө хоёр сарын хугацаа үлдээд байна. Хүүхдүүдийн зарим нь тав, ес, нэг хэсэг нь 12 жилд юу сурч мэдсэнээ шалгуулж нэг шатны сургуулиа дүүргэх гэж байна. Хүүхдүүд сургууль төгсөх, анги дэвших шалгалтуудаа ердөө л хичээлийнхээ дундуур өгч бүгдийг нэгэн зэрэг дуусгах ёстой болж таарч байна. Өөрөөр хэлбэл, ерөнхий боловсролын сургуулийн бүх ангиудын хичээлийн жил дуусах хугацаа нь зургадугаар сарын эхний долоо хоног. Харин улсын шалгалтуудын тов ирэх сарын 26-наас зургадугаар сарын 4 хүртэл үргэлжлэх нь. Энэ удаагийн улсын шалгалтын сэдэв даалгавар нь Монгол Улсад хэрэгжүүлж байгаа боловсролын үндэсний болон цөм хөтөлбөрийн агуулгад нийцсэн байхаар зохиогдохоос гадна бүтэц нь тест, задгай даалгавар хосолсон хэлбэрээр боловсруулагдаж байгаа аж. Түүнчлэн тавдугаар ангийн байгаль шинжлэлийн шалгалт “Хүн байгаль” хичээлийн агуулгыг багтаасан байх бол есдүгээр ангийн байгалийн ухааны шалгалтад “Биологи”, ”Газарзүй”, “Физик”, “Хими”-ийн хичээлийн агуулга багтсан байх нь. Мөн есдүгээр ангийн нийгмийн ухааны шалгалт “Түүх”, Нийгмийн ухаан”, “Англи хэл”, монгол хэлний шалгалт “Монгол хэл”, “Монгол бичиг”, “Уран зохиол” хичээлийн агуулгаас бүрдэх аж. 12 дугаар ангийн гадаад хэлний шалгалт ”Англи хэл”, “Орос хэл” гэсэн хоёр хичээлийн аль нэг агуулгыг багтаах бол сонгосон агуулгын шалгалт нь тухайн сурагчийн сонгосон хичээлээс шалтгаалах юм байна.

Төгсөх ангийн биш сурагчдын хувьд анги дэвших шалгалт өгөөд дараа жил нь дэвшээд суралцах боломжтой. Хэрвээ шалгалтаа амжилтгүй өгвөл дараа намар нь дахиад өгч болно. Харин нэг шатны сургууль дүүргээд ажил амьдралын замд орох гэж байгаа, дараагийн шатны сургуульд дэвшин суралцах гэж буй хүүхдүүдийн хувьд сургууль төгсөх буюу улсын шалгалт гэдэг тун хариуцлагатай нэг насных нь амьдралыг шийдэх зүйл байдаг.  Гэсэн хэдий ч энэ жил 12 дугаар анги төгсөх олон мянган хүүхэд улсын дөрвөн шалгалтаа хичээлээ хийнгээ завсраар нь өгөөд төгсөх болж байна. Ямартай ч шалгалт өгөхөөр бэлтгэж буй хүүхдүүдэд анхааруулж хэлэхэд Боловсролын үнэлгээний төвийн вэб сайтад тавигдсан боловсролын чанарын үнэлгээний судалгаа болон улсын шалгалтын сэдэв даалгаврууд нь энэ удаагийн Улсын шалгалтын жишиг даалгавар болох юм байна.