Монгол Улсын Шадар сайд Ц.Оюунбаатар баяр наадмын бэлтгэл ажлын талаар мэдээлэл хийсэн билээ. Үндэсний их баяр наадмын хөтөлбөрийг Наадмын комиссоос баталсан байна. Өөрөөр хэлбэл, Тулгар төрийн 2225, Их Монгол Улсын 810, Ардын хувьсгалын 95 жилийн ойн баяр энэ жил тохиож буй. Олон тэгш ой тохиож байгаа тул энэ жил өмнөх жилүүдийнхээс илүү олон буюу 1024 бөх барилдан зургаан насны 200 морь уралдуулахаар болжээ.

Үндэсний их баяр наадам АСЕМ-ын дээд түвшний 11 дүгээр уулзалтын өмнөхөн болж байгаа тул таван улсын Ерөнхийлөгч Монгол наадмыг үзэж сонирхох болсон байна. Жуулчдын тоо ч өмнөх жилүүдийнхээс илүү олон байна гэж Шадар сайд хэлэв.

Цэнгэлдэхийг зорьсон иргэдэд авто машины зогсоол жил бүр л асуудал болдог. Долдугаар сарын 6-ны өдрөөс эхлэн худалдаалах наадмын тасалбараас нэг иргэнд дээд тал нь дөрвөн ширхгийг худалдаалах юм.

Цэнгэлдэх хүрээлэнд наадамлахаар ирсэн иргэдийн авто машинд зориулан нийт долоон давхар бүхий 500 машины зогсоолыг ашиглалтад оруулахаар ажиллаж байгаа. Төв цэнгэлдэх хүрээлэнгийн зүүн хойд талд байрлалтай авто машины уг зогсоолын гадна тохижилтын ажлыг хийж байгаа бол “Дүнжингарав”, “Japan town” хотхоны гадна талбайг мөн зогсоол болгон ашиглах аж.