Элсэлтийн ерөнхий шалгалт энэ сарын 14-нөөс Монгол хэл бичгийн шалгалтаар эхэлсэн. Өчигдөр англи хэл, хими, Монгол Улсын түүхийн шалгалт өгсөн шалгуулагчид маань өнөөдөр түр амсхийж байна. Харин маргааш их, дээд сургуульд элсэхээр шалгалт өгч буй хүүхдүүдийн маань хувьд хамгийн хүнд өдөр болох нь. Учир нь, хамгийн олон шалгуулагч математик, монгол хэлний шалгалтаа энэ өдөр өгөх юм.
Ямартай ч ням гарагт дуусах шалгалтын материалуудыг энэ сарын 19-нөөс эхлэн засч, дүн мэдээг нь ирэх сарын 1-ний 09:00 цагаас эхлэн www.eec.mn вэбсайтад байршуулж, шалгуулагчид танилцах боломжтой болох юм байна.

Харин ЭЕШ-ын батламж хуудсаа ирэх сарын 3-наас авах аж. Хөдөө орон нутгийн шалгуулагчид аймаг, дүүргийнхээ Боловсрол, соёл, урлагийн газрын ЭЕШ хариуцсан мэргэжилтнээс батламж хуудсаа авах бол нийслэлд ЭЕШ өгсөн энэ оны төгсөгчид сургуулийнхаа захиргаанаасаа авах юм байна.  Өмнөх оны төгсөгчид Боловсролын үнэлгээний төвөөс батламж хуудсаа авах бөгөөд уг батламж хуудас нь шалгалт өгснөөс хойш 2.5 жилийн хугацаанд хүчинтэй байх аж.