НҮБ 1994 оноос эхлэн жил бүрийн аравдугаар сарын 5-ны өдрийг Дэлхийн багш нарын өдөр болгон зарласнаас хойш 24, Монголын багш нарын өдрийг 52 дахь жилдээ тэмдэглэн өнгөрүүлэх гэж байна. Боловсрол, соёл, шинжлэх ухаан, спортын яам “Сайн багшаас сайн шавь төрнө” гэсэн үзэл баримтлалынхаа дагуу 2018-2019 оны хичээлийн жилийг Багшийн хөгжлийг дэмжих жил болгон зарласан. Жилийн хүрээнд болон багш нарын өдрийг угтан өнгөрсөн сарын 05-наас энэ сарын 05-ны өдрийг хүртэл “Багшийн хөгжил-2018” аяныг орон даяар өрнүүлж буй билээ.
Энэ удаагийн багш нарын баярыг зүгээр л нэг ёслолын арга хэмжээ төдий биш нийгэмд багшийг дэмжих сэтгэл зүйг бий болгох агуулгын дор тэмдэглэх гэж байна. Тиймдээ ч өнөөгийн багш нарын амьдралыг харуулсан бүрэн хэмжээний уран сайхны “БАГШ” киног бүтээж, Монголын болон олон улсын багш нарын өдөр олны хүртээл болгохоор зэхжээ. Түүгээр ч зогсохгүй цэцэрлэгийн багш нарын өдөр тутмын үйл ажиллагааг харуулсан баримтат кино болон багшийн үнэ цэнийг мэдрүүлсэн нийтлэлүүдийг олон нийтэд хүргэсээр байгаа.
Хүүхэд, багачууд маань Олон улсын олимпиадуудад амжилттай оролцож, Оюун ухаан, ой тогтоолтоор дэлхийн дээд рекорд тогтоож Геннисийн номд бүртгэгдсэн амжилтууд нь багшийн ажлын үр шим учраас багшаа алдаршуулах уламжлалт арга хэмжээг ч энэ жилийн багш нарын өдрөөр зохион байгуулах нь. Тухайлбал, Улсын тэргүүний сургууль, боловсролын гол түнш болох төрийн бус байгууллага, онцгой амжилт гаргасан багш нараа энэ өдөр шагнаж урамшуулах аж.
