Багш ажилтнууд өнгөрсөн оны 9 дүгээр сард боловсрол, шинжлэх ухааны салбарын ажилтнуудын цалин хөлсийг нэмэгдүүлэх шаардлага тавьж, ажил хаялт хийсэн билээ. Засгийн газрын түвшинд ажилласан Ажлын хэсгийн гаргасан санал, дүгнэлтээр 2018-2019 онд нэмэлт хэлэлцээр байгуулж, боловсролын салбарт ажиллагчдын цалин хөлс 2018 оны 10 дугаар сарын 1-нээс 7 орчим хувиар нэмэгджээ.
Харин Засгийн газраас 2019 оны 1 дүгээр сарын 1-нээс төрийн албан хаагчдын цалин нэмэхдээ 26 мянга гаруй туслах ажилтны цалинг 1-1,5 хувиар нэмэгдүүлж байгаа нь гэрээ хэлэлцээрээр хүлээсэн үүргээ биелүүлээгүй гэж үзэж байна хэмээн БШУҮЭ-ны дарга Ж.Батзориг мэдэгдлээ.
Тэд төр засгийн амлалтад итгэж ажил хаялтаа түр зогсоосон ч бодит амьдрал дээр цалин 6-10 мянган төгрөгөөр нэмэгдэж, үнийн өсөлт, инфляцид идэгдсэн гэдгийг дуулгаад хамтын маргаанаа үргэлжлүүлж, дараагийн шатны арга хэмжээнд орно гэдгээ сэтгүүлчдэд мэдээллээ.
